সমগ্ৰ ৰাজ্যৰ লগতে শিৱসাগৰতো আজি উলহ মালহেৰে ৭০ সংখ্যক গণৰাজ্য দিৱস উদযাপন কৰা হয়। পুৱা প্ৰভাত ফেৰীৰে আৰম্ভ হয় গণৰাজ্য দিৱস কাৰ্য্যসূচী। তাৰ পিছতেই পিয়লি ফুকন উদ্যান আৰু আনন্দৰাম বৰুৱা উদ্যানত চহিদ তৰ্পণ কৰা হয়।
শিৱসাগৰ জিলা প্ৰশাসনৰ উদ্যোগত নগৰৰ বৰ্ডিং খেলপথাৰত আয়োজন কৰা গণৰাজ্য দিৱসৰ কাৰ্য্যসূচীত পতকা উত্তোলন কৰে নগৰ উন্নয়ন (স্বতন্ত্ৰ) তথা স্বাস্থ্য আৰু পৰিয়াল কল্যান বিভাগৰ (ৰাজ্যিক) মন্ত্ৰী পিয়ুষ হাজৰিকাই। পতকা উত্তোলনৰ আগত মন্ত্ৰী গৰাকীয়ে ভাৰত ৰত্ন ড০ ভূপেন হাজৰিকাৰ প্ৰতিছব্বিত শ্ৰদ্ধাঞ্জলি জনায়।
পতকা উত্তোলনৰ পিছতেই আৰক্ষী, স্কাউট-গাইড আৰু গৃহৰক্ষী জোৱানৰ দ্বাৰা কুছ-কাৱাজ প্ৰদৰ্শন কৰা হয়। তাৰ পিছত বিদ্যালয়-মহাবিদ্যালয়ৰ ছাত্ৰ-ছাত্ৰীৰ দ্বাৰা বিভিন্ন সাংস্কৃতিক কাৰ্যসূচী অনুষ্ঠিত হোৱাৰ লগতে কণ কণ লৰা-ছোৱালীৰ মাজত বিভিন্নধৰণৰ খেল ধেমালী অনুষ্ঠিত কৰা হয়। ইয়াৰ লগতে মন্ত্ৰী পিয়ুষ হাজৰিকাই জিলাখনৰ বিভিন্ন বিভাগত উৎকৃষ্ট সেৱা আগবঢ়োৱা বহুকেইজন ব্যক্তিক উৎকৃষ্টতাৰ বঁটা প্ৰদান কৰে।
আনহাতে জিলা প্ৰশাসনে কাৰাগাৰৰ কয়দী সকলৰ লগতে জিলা অসামৰিক চিকিৎসালয়ৰ ৰোগী আৰু প্ৰসূতি তথা স্বপ্নালয়, কৌমুদালয় আৰু বৃদ্ধাশ্ৰমত ফলমূল, গৰম কাপোৰ আৰু নিত্য ব্যৱহাৰ্য সামগ্ৰী বিতৰণ কৰে। বিয়লি জিলা প্ৰশাসন আৰু শিৱসাগৰ জিলা শিক্ষা বিভাগৰ মাজত এখনি প্ৰীতি ক্ৰিকেট খেল অনুষ্ঠিত হয়।
ইয়াৰ উপৰিও শিৱসাগৰৰ বিভিন্ন অনুষ্ঠান-প্ৰতিষ্ঠান, চৰকাৰী-বেচৰকাৰী কাৰ্য্যালয়, স্কুল-কলেজ আদিত দেশৰ ৭০ সংখ্যক গণৰাজ্য দিৱসৰ পতাকা উত্তোলন কৰা হয়। শিৱসাগৰ প্ৰেছ ক্লাবতো পুৱা ক্লাবৰ সভাপতি, সম্পাদক তথা আন সাংবাদিকৰ উপস্থিতিত পতকা উত্তোলন কৰা হয়।
