গুজৰাটৰ পঞ্চায়ত আৰু কৃষি ৰাজ্যিক মন্ত্ৰী বচ্চু খবৰৰ পুত্ৰ বলৱন্ত সিং খাবৰক কোটি কোটি টকাৰ দুৰ্নীতিৰ অভিযোগত গ্ৰেপ্তাৰ কৰা হৈছে। মাত্ৰ ১০০ দিনীয়া কৰ্ম প্ৰকল্পত এই দুনীৰ্তি সংঘটিত কৰাৰ অভিযোগ উত্থাপন হৈছে। শনিবাৰে ডাহোৰ আৰক্ষীয়ে গ্ৰেপ্তাৰ কৰিছে বিজেপি মন্ত্ৰীৰ পুত্ৰক।
আৰক্ষী সূত্ৰ অনুসৰি মন্ত্ৰীগৰাকীৰ পুত্ৰই মহাত্মা গান্ধী ৰাষ্ট্ৰীয় গ্ৰাম্য নিয়োগ নিশ্চয়তা আইন চমুকৈ এম জি এনৰেগাৰ পৰা ৭৫ কোটি টকা আত্মসাৎ কৰাৰ অভিযোগ উত্থাপন হৈছে। বলৱন্ত সিং আৰু তেওঁৰ কনিষ্ঠ ভাতৃ কিৰণে ডাহোৰ আদালতত আগজাননীমূলক জামিনৰ বাবে আবেদন কৰিছিল যদিও শেষত সেই জামিন প্ৰত্যাহাৰ কৰে। তাৰ পিছতে আৰক্ষীয়ে গ্ৰেপ্তাৰ কৰিছে।
ডাহোদৰ উপ-আৰক্ষী অধীক্ষক জগদীশ ভাণ্ডাৰীয়ে কয় যে জিলা গ্ৰামোন্নয়ন প্ৰাধিকৰণে দাখিল কৰা এফ আই আৰৰ ভিত্তিত প্ৰাথমিক তদন্তত বলৱন্ত সিঙৰ জড়িততাৰ ইংগিত পোৱা গৈছে। গতিকে তেওঁক গ্ৰেপ্তাৰ কৰা হৈছে।
ভাণ্ডাৰীয়ে কয়, “যদিও বলৱন্ত সিঙে এটা কোম্পানীয়ে এমজিএনৰেগা প্ৰকল্পৰ বাবে সামগ্ৰী যোগান ধৰা বুলি দাবী কৰিছিল, বাস্তৱত সামগ্ৰীৰ সম্পূৰ্ণ তালিকা প্ৰদান কৰা হোৱা নাছিল। টকা আত্মসাৎৰ সঠিক পৰিমাণ আমি এতিয়াও জানিব পৰা নাই। বলৱন্ত সিঙৰ ভাতৃ কিৰণৰ বিৰুদ্ধেও তদন্ত চলি আছে।”
যোৱা ৪ এপ্ৰিলত দাখিল কৰা এফ আই আৰত অভিযোগ কৰা হৈছে যে যিবোৰ কোম্পানীয়ে প্ৰকল্পসমূহৰ সামগ্ৰী যোগান ধৰাৰ দায়িত্বত নপৰে সেইবোৰকো কাম প্ৰদান আৰু অবৈধভাৱে বিল জমা দিয়াৰ অনুমোদন দিয়া হৈছিল। দেৱগড় বৰীয়াৰ কুভা গাঁৱত এটা প্ৰকল্প ৰূপায়ণৰ বাবে এখন বিধেয়ক গৃহীত হ’ল যদিও গাঁওবাসীয়ে অভিযোগ কৰিছে যে প্ৰকৃততে তাত কোনো কাম কৰা হোৱা নাই।
আনহাতে, দহোৰ জিলা আৰক্ষীয়ে ইয়াৰ পূৰ্বে এই গোচৰত ৫জন লোকক গ্ৰেপ্তাৰ কৰিছে। তেওঁলোক হ‘ল – এম জি এনৰেগা শাখাৰ দুজন একাউণ্টেণ্ট জয়ীৰ নাগৰী আৰু মহিপাল সিং চৌহান, গাঁৱৰ নিয়োগ কৰ্মী কুলদীপ বৰিয়া আৰু মংগলসিং পটেলিয়া, আৰু কাৰিকৰী সহায়ক মনীষ পেটেল।
এই ঘটনা পোহৰলৈ অহাৰ লগে লগে কংগ্ৰেছে বিজেপিক সমালোচনা কৰিছে। কংগ্ৰেছ নেতা অমিত চাভ্ৰাই দাবী কৰে যে, “গুজৰাটত বিজেপিৰ ৩০ বছৰীয়া শাসনকালত দুৰ্নীতি প্ৰশাসনৰ মূল বৈশিষ্ট্য হৈ পৰিছে। ডাহোৰ কেলেংকাৰীত চৰকাৰৰ নিষ্ক্ৰিয়তাই প্ৰমাণ কৰে যে বাৰে বাৰে অভিযোগৰ পিছতো কোনো ব্যৱস্থা গ্ৰহণ কৰা হোৱা নাই। আমি এই বিষয়টো বিধানসভাত বাৰে বাৰে উত্থাপন কৰিছো। এতিয়া এটা নিৰপেক্ষ বিশেষ তদন্তকাৰী দল গঠন কৰাৰ সময়।”
