২০২৬-২৭ বৰ্ষৰ খাৰিফ শস্যৰ বাবে কেন্দ্ৰীয় চৰকাৰে ঘোষণা কৰা ন্যূনতম সহায়ক মূল্যক লৈ তীব্ৰ ক্ষোভ প্ৰকাশ কৰিছে সংযুক্ত কিষাণ মৰ্চাই। সংগঠনটোৰ মতে, চৰকাৰে ন্যূনতম সহায়ক মূল্য ঘোষণা কৰাৰ সময়ত কৃষকৰ প্ৰকৃত উৎপাদন ব্যয় সঠিকভাৱে হিচাপ কৰা নাই। ইয়াৰ ফলত কেৱল ধান খেতিয়কসকলৰে প্ৰতি কুইণ্টলত ৮০২ টকাকৈ লোকচান হ’ব বুলি মৰ্চাই দাবী কৰিছে। সদৌ ভাৰত কৃষক সভাৰ দৰে দেশৰ শতাধিক কৃষক আৰু খেতিয়ক সংগঠনৰ এই উমৈহতীয়া মঞ্চখনে এতিয়া কেন্দ্ৰীয় চৰকাৰৰ এই নতুন নিৰ্দেশনাৰ প্ৰতিলিপি প্ৰতিখন গাঁৱতে দাহ কৰাৰ বাবে আহ্বান জনাইছে।
দেশৰ কৃষক আৰু কৃষি শ্ৰমিকসকলৰ বৰ্তমানৰ শোচনীয় অৱস্থাৰ ছবিখন দাঙি ধৰি সংযুক্ত মৰ্চাই আত্মহত্যাৰ এক ভয়াবহ পৰিসংখ্যাও দাঙি ধৰিছে। ৰাষ্ট্ৰীয় অপৰাধ ৰেকৰ্ড ব্যুৰ’ৰ ২০২৪ চনৰ প্ৰতিবেদন অনুসৰি, বৰ্তমান দেশৰ গ্ৰামাঞ্চলত প্ৰতিদিনে গড়ে ১৭৩ জনকৈ কৃষক বা কৃষিজীৱী লোকে আত্মহত্যা কৰিবলগীয়া হৈছে। আনহাতে, ২০১৪ চনত যেতিয়া কেন্দ্ৰত নৰেন্দ্ৰ মোদীৰ নেতৃত্বত বিজেপি চৰকাৰ গঠন হৈছিল, তেতিয়া এই দৈনিক গড় আত্মহত্যাৰ সংখ্যা আছিল ৭৭ জন। কৃষকসকলে সাধাৰণতে চৰকাৰে নিৰ্ধাৰণ কৰি দিয়া দামত ফচল বিক্ৰী কৰিব লাগে যদিও মধ্যভোগী আৰু দালালে একাংশ অঞ্চলত আধিপত্য বিস্তাৰ কৰাৰ বাবে বহু সময়ত কৃষকসকলে উচিত মূল্য নাপায় আৰু কম দামতে শস্য বিক্ৰী কৰিবলৈ বাধ্য হয়। তদুপৰি এই সহায়ক মূল্যৰ হিচাপ-নিকাচত মোদী চৰকাৰে কাৰচাজি কৰা বুলিও দীৰ্ঘদিনৰে পৰা অভিযোগ উত্থাপন হৈ আহিছে।
চৰকাৰৰ তৰফৰ পৰা দাবী কৰা হৈছে যে স্বামীনাথন আয়োগৰ পৰামৰ্শ অনুসৰি প্ৰকৃত উৎপাদন খৰচৰ সৈতে আৰু ৫০ শতাংশ ধন যোগ দিহে এই সহায়ক মূল্য নিৰ্ধাৰণ কৰা হৈছে। চৰকাৰে এই খৰচৰ হিচাপটো লাভ কৰে কৃষি ব্যয় আৰু মূল্য আয়োগ বা চিএচিপিৰ পৰা। কিন্তু সদৌ ভাৰত কৃষক সভা আৰু সংযুক্ত কিষাণ মৰ্চাই চৰকাৰৰ এই দাবী একেবাৰে খাৰিজ কৰিছে। কৃষক নেতাসকলৰ মতে, স্বামীনাথন আয়োগে কৃষকৰ খৰচ হিচাপ কৰাৰ সময়ত কেৱল সাৰ আৰু বীজৰ খৰচ বা পৰিয়ালৰ শ্ৰমকে ধৰিবলৈ কোৱা নাছিল, বৰঞ্চ কৃষি ঋণৰ সুদ আৰু নিজৰ মাটিখন আনক দিলে যিমান ভাড়া পোৱা গ’লহেঁতেন, সেই সকলোবোৰ যোগ কৰিবলৈ পৰামৰ্শ দিছিল। কিন্তু চৰকাৰী আয়োগে বৰ্তমান ঋণৰ সুদ আৰু মাটিৰ মূল্যক এই হিচাপত অন্তৰ্ভুক্ত কৰা নাই।
সংযুক্ত কিষাণ মৰ্চাৰ মতে, যদি স্বামীনাথন আয়োগৰ সম্পূৰ্ণ সূত্ৰ মানি খৰচৰ হিচাপ কৰা হ’লহেঁতেন আৰু তাৰ ওপৰত ৫০ শতাংশ যোগ কৰা হ’লহেঁতেন, তেন্তে ধানৰ প্ৰতি কুইণ্টলৰ ন্যূনতম সহায়ক মূল্য হ’লহেঁতেন ৩২৪৩ টকা। কিন্তু চৰকাৰে কেৱল সাৰ-বীজৰ খৰচ আৰু পৰিয়ালৰ শাৰীৰিক শ্ৰমৰ ওপৰত ৫০ শতাংশ যোগ দি এই মূল্য ২৪৪১ টকা নিৰ্ধাৰণ কৰিছে, যাৰ বাবে কৃষকে প্ৰতি কুইণ্টলত ৮০২ টকাকৈ লোকচান ভৰিবলগীয়া হৈছে। মৰ্চাই অভিযোগ কৰিছে যে যোৱা এটা বছৰত সাৰ, বীজ, কীটনাশক আৰু ইন্ধনৰ দাম বহুত বাঢ়ি গৈছে আৰু কৃষকসকলে এইবোৰ ক’লা বজাৰৰ পৰা কিনিব লগা হৈছে, কিন্তু চৰকাৰে খৰচ ধৰিছে ১৫ বছৰ পুৰণি মূল্যস্তৰৰ আধাৰত। চৰকাৰে ২০২৬-২৭ বৰ্ষৰ খাৰিফ শস্যৰ বাবে ২.৬ লাখ কোটি টকা খৰচ হ’ব বুলি ক’লেও মৰ্চাৰ হিচাপ মতে বিগত ১০ বছৰত সঠিক সহায়ক মূল্য নিদিয়াৰ বাবে কৃষকসকলৰ প্ৰায় ২৭ লাখ কোটি টকাৰ লোকচান হৈছে, যি সময়ত চৰকাৰে উদ্যোগপতিসকলৰ লাখ লাখ কোটি টকাৰ ঋণ ৰেহাই দিছে।
কৃষক সংগঠনটোৱে লগতে প্ৰকাশ কৰিছে যে যদি কোনো ৰাজ্য চৰকাৰে কৃষকক সহায় কৰিবলৈ এই মূল্যৰ ওপৰত অতিৰিক্ত বোনাচ দিব বিচাৰে, তাতেও কেন্দ্ৰীয় আয়োগে আপত্তি দৰ্শায়। মৰ্চাৰ অভিযোগ অনুসৰি, এই সমগ্ৰ কৃষি ব্যয় নিৰ্ধাৰণকাৰী ব্যৱস্থা আৰু কেন্দ্ৰীয় চৰকাৰে আচলতে বিশ্ব বাণিজ্য সংস্থা আৰু আমেৰিকাৰ দৰে বিদেশী শক্তিৰ নীতি অনুসৰণ কৰি চলিছে। তেওঁলোকে কৃষকক দিয়া চৰকাৰী সাহায্যক বজাৰৰ এক খেলিমেলি বা ক্ষতি বুলি গণ্য কৰে আৰু দেশৰ চৰকাৰ তথা আয়োগেও ঠিক তেনেদৰেই চিন্তা কৰি নিজৰ দেশৰ কৃষকক মাধমাৰ শোধাইছে।
