এগৰাকী ৯ বছৰীয়া, চতুৰ্থ শ্ৰেণীৰ ছাত্ৰী।দুপৰীয়া কণমানিজনী টিফিন খাবলৈ বহি আছিল খোৱা নাছিল।আৰু হঠাৎ কণমানিগৰাকীৰ চেতনা হেৰাই যায়। যাৰ পাছত শিক্ষকসকলে লৰালৰিকৈ ছাত্ৰীগৰাকীৰ ওচৰ পাইগৈ। খৰধৰকৈ তেওঁক স্থানীয় চিকিৎসালয়লৈ লৈ যোৱা হয়। তাৰ পৰাই তেওঁক ডাঙৰ চিকিৎসালয়লৈ বদলি কৰা হয় যদিও তেওঁক ৰক্ষা কৰিব পৰা নাছিল। মঙলবাৰে পুৱা ৰাজস্থানৰ এখন বিদ্যালয়ত সংঘটিত হয় এই কৰুণ ঘটনা।
ৰাজস্থানৰ ছিকাৰ জিলাৰ দন্তা চহৰত সংঘটিত হৈছে এই ঘটনা। ৯ বছৰীয়া প্ৰাচী কুমাৱতৰ মৃত্যু। পৰিয়ালৰ সূত্ৰৰ পৰা জানিব পৰা মতে, ছাত্ৰীগৰাকীৰ কোনো ধৰণৰ শাৰীৰিক অসুস্থতা নাছিল। অৱশ্যে ছিকাৰৰ আদৰ্শ বিদ্যামন্দিৰ বিদ্যালয়ৰ অধ্যক্ষ নন্দকশোৰ তিৱাৰীয়ে কয় যে বিগত তিনি-চাৰি দিন ধৰি প্ৰাচী বিদ্যালয়ত অনুপস্থিত আছিল। তেওঁৰ সামান্য চৰ্দি হৈ আছিল। অৱশ্যে সোমবাৰৰ পৰা স্কুললৈ আহিছিল। তেওঁ খেলা-ধূলা কৰি আছিল, প্ৰাৰ্থনাত অংশ লৈছিল, কেইবাটাও ক্লাছ লৈছিল।
চিকিৎসকে কয় যে প্ৰাচী হৃদৰোগত আক্ৰান্ত হ’ব পাৰে। তাৰ শৰীৰৰ লক্ষণবোৰে সেই দিশলৈ আঙুলিয়াই দিছিল। চিকিৎসালয়খনৰ এগৰাকী চিকিৎসকে জনোৱা মতে, ৯ বছৰীয়া শিশুটিক চিকিৎসালয়লৈ অনাৰ সময়ত তেওঁৰ হৃদস্পন্দন নাছিল। চিপিআৰৰো কোনো কাম নাছিল। অক্সিজেন আৰু সকলো জৰুৰীকালীন ঔষধে তেওঁক বচাব পৰা নাছিল। প্ৰাচীৰ আকস্মিক মৃত্যুত পৰিয়াল আৰু ওচৰ-চুবুৰীয়াই শোক প্ৰকাশ কৰিছে।
