আজি ভাৰতৰত্ন ড০ ভূপেন হাজৰিকাৰ ৯৪ সংখ্যক জন্মদিন।
সমগ্ৰ ৰাজ্যৰ লগতে শিৱসাগৰতো আজি জয়দয়াল মাতৃ সেৱা সদনৰ সন্মুখত থকা ড০ ভূপেন হাজৰিকাৰ পূৰ্ণাংগ আৱক্ষ মূৰ্তিৰ সন্মুখত চৰকাৰী নীতি নিৰ্দেশনা মানি অনুষ্টুপিয়াকৈ উদযাপন কৰা হয় প্ৰয়াত শিল্পী গৰাকীৰ জন্মদিন।
দিখৌপৰীয়া সন্মিলিত যুৱ সংঘৰ উদ্যোগত আৰু জিলা প্ৰশাসনৰ সহযোগত সুধাকণ্ঠৰ জন্মদিন উদযাপন কৰা হয়।
পুৱা ড০ হাজৰিকাৰ আৱক্ষ মূৰ্তিত বন্তি প্ৰজ্বলনেৰে শ্ৰদ্ধা নিবেদন কৰি জিলা উপায়ুক্ত লক্ষ্মীনন্দন গগৈয়ে ড০ হাজৰিকা সম্পৰ্কে এক চমু বক্তব্য আগবঢ়োৱাৰ লগতে গড়গাঁও মহাবিদ্যালয়ৰ অধ্যক্ষ ড০ সব্যসাচি মহন্তই হাজৰিকাৰ কৰ্মৰাজীৰ ওপৰত আলোকপাত কৰে।
ইয়াৰ পিছতে জিলা উপায়ুক্ত লক্ষ্মীনন্দন গগৈয়ে প্ৰয়াত শিল্পী গৰাকীৰ জন্মদিন উপলক্ষ্যে কেক কটা পৰ্ব সম্পন্ন কৰাৰ পাছতে ‘গীতেৰে সোৱৰণ’ শীৰ্ষক অনুষ্ঠানত ৰাজকুমাৰী ফাল্গূনী, জয়ন্ত দত্ত, কাকু ভট্টাচাৰ্য্যী, অতনু বৰা আদিয়ে ভূপেন হাজৰিকাৰ কেইবাটাও কালজয়ী গীত পৰিৱেশন কৰে।
দিখৌপৰীয়া সন্মিলিত যুৱ সংঘৰ সভাপতি ৰতন শইকীয়াৰ শুভেচ্ছা মূলক বক্তব্যৰে অনুষ্ঠানৰ সামৰণি পৰে।
