সোমবাৰে অভিলেখ গঢ়ি ২৪ ঘন্টাত কৰ’না আক্ৰান্তৰ সংখ্যাই ১ লাখৰ সীমা স্পৰ্শ কৰিছিল যদিও মঙলবাৰে তাৰ তুলনাত আক্ৰান্তৰ সংখ্যা সামান্য হ্ৰাস পাইছে।
সেইদৰে,দৈনিক মৃত্যুৰ সংখ্যাও হ্ৰাস পাইছে যদিও সামগ্ৰিকভাৱে কৰ’নাৰ সংক্ৰমণৰ হাৰ সিমান সন্তোষজনক নহয়।
কৰ’নাৰ এনে বৰ্দ্ধিত সংক্ৰমণ ৰোধ কৰাৰ লক্ষ্যেৰে প্ৰধানমন্ত্ৰী মোদীয়ে অহা ৮ এপ্ৰিলত পুনৰ মুখ্য মন্ত্ৰীসকলৰ সৈতে বৈঠক আহ্বান কৰিছে।
মঙলবাৰে পুৱা কেন্দ্ৰীয় স্বাস্থ্য মন্ত্ৰ্যালয়ে প্ৰকাশ কৰা তথ্য অনুসৰি, বিগত ২৪ ঘন্টাত দেশত ৯৬হাজাৰ ৯৮২জন লোক কৰ’নাত আক্ৰান্ত হৈছে। এই সংখ্যা পূৰ্বৰ দিনৰ তুলনাত পাঁচ হাজাৰ কম।
দেশত এতিয়ালৈকে মুঠ কৰ’নাত আক্ৰান্তৰ সংখ্যা হৈছেগৈ ১কোটি ২৬লাখ ৮৬হাজাৰ ৪৯জন। সেইদৰে কৰ’নাৰ ফলত মুঠ মৃত্যুৰ সংখ্যা হৈছেগৈ ১লাখ ৬৫হাজাৰ ৫৪৭জন।
বিগত ২৪ ঘন্টাত দেশত কৰ’নাত মৃত্যু হৈছে ৪৪৬জনৰ। আনহাতে, বিগত ২৪ ঘন্টাত দেশত ৫০হাজাৰ ১৪৩জন লোক কৰ’নাৰ পৰা আৰোগ্য লাভ কৰিছে।
দেশখনত মুঠ সক্ৰিয় কৰ’না ৰোগীৰ সংখ্যা ৭লাখ ৮৮হাজাৰ২২৩জনলৈ বৃদ্ধি পাইছে। সেইদৰে, দেশত এতিয়ালৈকে মুঠ ১ কোটি ১৭লাখ ৩২হাজাৰ ২৭৯জনলোক কৰ’নাৰ পৰা সুস্থ হৈ উঠিছে।
আনহাতে, দেশত এতিয়ালৈকে ৮কোটি ৩১লাখ ১০হাজাৰ ৯২৬জন লোকে কৰ’নাৰ ভেকচিন গ্ৰহণ কৰিছে।
