বাক্সা জিলাৰ তামুলপুৰ মহকুমাৰ নাগ্ৰীজুলি আৰক্ষী চকীৰ অন্তৰ্গত ডোঙাৰগাঁৱত এজন যুৱকৰ মৃতদেহ উদ্ধাৰ হোৱা ঘটনাই সমগ্ৰ অঞ্চলটোত চাঞ্চল্যৰ সৃষ্টি কৰিছে।
নিশা কোনো অচিনাক্ত দুৰ্বৃত্তই যুৱক জনক হানি-খুচি হত্যা কৰাৰ সন্দেহ প্ৰকাশ কৰিছে আত্মীয়ই।
মৃত যুৱকজন হৈছে নাগ্ৰীজুলি আৰক্ষী চকীৰ অন্তৰ্গত দেওচুঙা গাঁৱৰ ২৬ বছৰীয়া ৰাজু বড়ো ওৰফে কাতিৰাম বড়ো।
পৰিয়ালৰ লোকৰ পৰা জানিব পৰা মতে, বিগত বহু দিন ধৰি দেওচুঙা গাঁও নিবাসী সুৰেন বড়োৰ পুত্ৰ ৰাজুই ঠিকাদাৰ অধীনত মহৰী হিচাপে কাম কৰা ডোঙাৰগাঁৱৰ ইমতাজ আলি নামৰ লোক এজনৰ অধীনত শ্ৰমিক হিচাপে কাম কৰি আহিছিল।
ৰাজুয়ে ইমতাজৰ পৰা বহুত টকা পাবলৈ আছিল আৰু টকা বিচাৰি মাজে মাজে ইমাতজৰ ঘৰলৈ গৈছিল যদিও ৰাজুক পাব লগা টকা আদায় দিয়া নাছিল ইমতাজে।
আনকি দিন হাজিৰা কৰা ৰাজুৰ মাতৃয়েও বহু দিন টকা বিচাৰি ইমাতজৰ ওচৰলৈ গৈ বিফল হৈ ঘূৰি আহিছিল বুলি অভিযোগ কৰিছে ৰাজুৰ পৰিয়ালৰ সদস্যই।
পৰিয়ালৰ লোকে জনোৱা মতে, কালি সন্ধিয়া ৭-০০ মান বজাত ৰাজুক ইমতাজে ফোন কৰি টকা আনিবলৈ মাতি নিয়ে। ৰাজুয়ে ইমাতজৰ ফোন পাই টকা আনিবলৈ ডোঙাৰগাঁৱলৈ যায় যদিও নিশা ঘৰলৈ ঘূৰি নহাত পৰিয়ালৰ লোকে সকল চিন্তিত হয়।
ইপিনে, আজি পুৱা ৭-৩০ মান বজাত ডোঙাৰগাঁৱৰ এটা নলাত পৰি থকা অৱস্থাত এটা মৃতদেহ উদ্ধাৰ হয়। উদ্ধাৰ হোৱা মৃতাদেহটো পৰিয়ালৰ লোকে ৰাজু ওৰফে কাতিৰামৰ বুলি চিনাক্ত কৰাত হাহাকাৰ অৱস্থাৰ সৃষ্টি হয়।
পিছত স্থানীয় লোকে নাগ্ৰীজুলি আৰু শুৱাগপুৰ আৰক্ষী চকীত খবৰ দিয়াত নাগ্ৰীজুলি আৰু শুৱাগপুৰৰ পৰা আৰক্ষীৰ দল ঘটনাস্থলীত উপস্থিত হৈ মৃতদেহ উদ্ধাৰ কৰি নাগ্ৰীজুলি আৰক্ষী চকীলৈ লৈ আনে আৰু মৰণোত্তৰ পৰীক্ষাৰ বাবে বাক্সা জিলা সদৰ মুছলপুৰলৈ প্ৰেৰণ কৰে।
ইপিনে ৰাজুয়ে কালি নিশা চাৰি জন যুৱকৰ লগত ডোঙাৰগাঁওত মদ আৰু মাংসৰে খানা খাইছিল। যুৱক কেইজনে এই কথা স্বীকাৰ কৰিছে যে ৰাজুয়ে তেওঁলোকৰ লগত খানা খাইছিল আৰু খানা খোৱাৰ পিছত ঘৰলৈ উভতিছিল।
ইতিমধ্যে ৰাজুৰ লগত খানা খোৱা চাৰি যুৱকক নাগ্ৰীজুলি আৰক্ষীয়ে আটক কৰি সোধা-পোছা অব্যাহত ৰাখিছে।
ৰাজুৰ পৰিয়ালৰ লোকে এই হত্যাকাণ্ডৰ সৈতে ইমতাজ আলি জড়িত থকাৰ সন্দেহ প্ৰকাশ কৰিছে। পৰিয়ালৰ লোকে অভিযোগ কৰা মতে ইমাতজৰ ঘৰৰ ওচৰত ৰাজুৰ মৃতদেহ উদ্ধাৰ হৈছিল।
