সমাগত ৰাজ্যসভাৰ নিৰ্বাচন। অহা ২৬ মাৰ্চত অনুষ্ঠিত হ’ব ১৭ খন ৰাজ্যৰ ৮৩ খন আসনৰ বাবে ৰাজ্যসভাৰ নিৰ্বাচন। অহা ৯ এপ্ৰিলত ৰাজ্যৰ তিনিখনকৈ ৰাজ্যসভাৰ আসনৰ সময়সীমা উকলিব।
ইয়াক লৈ শাসকীয় বিজেপি আৰু বিৰোধী কংগ্ৰেছে আৰম্ভ কৰিছে ৰাজনৈতিক সমীকৰণ। তিনিওখন আসনক কেন্দ্ৰ কৰি শাসক-বিৰোধীৰ মাজত বহু জল্পনা কল্পনা চলি থকাৰ মাজতে দুখন আসনৰ বাবে প্ৰাৰ্থীত্ব প্ৰদান কৰিলে বিজেপিয়ে।
প্ৰথমখন আসনত সদ্য পদত্যাগী প্ৰাক্তন কংগ্ৰেছী সাংসদ ভূৱনেশ্বৰ কলিতাকে পুনৰবাৰ প্ৰাৰ্থীত্ব দিলে বিজেপিয়ে। দ্বিতীয়খন আসনৰ বাবে বিজেপিয়ে প্ৰক্ষেপ কৰিলে মিত্ৰজোঁটৰ প্ৰাৰ্থী বিপিএফৰ সাংসদ বিশ্বজিৎ দৈমাৰীক।
কংগ্ৰেছক দুৰ্বল কৰি বিজেপিত যোগদান কৰা ভুৱনেশ্বৰ কলিতাক পুনৰবাৰ পুৰস্কৃত কৰিলে বিজেপিয়ে। বিজেপিৰ এক উচ্চস্তৰীয় সুত্ৰই এই কথা প্ৰকাশ কৰিছে। যোৱা বৰ্ষৰ ৫ আগষ্টত ৰাজ্যসভাৰ সাংসদৰ পৰা পদত্যাগ কৰিছিল কলিতাই। তাৰ পাছতে কলিতাই ৯ আগষ্টত বিজেপিত যোগদান কৰিছিল।
উল্লেখ কৰিব পাৰি যে, খালী হ’বলগীয়া তিনিখন আসনৰ ভিতৰত দুখন আসনৰ বিজয়ত নিশ্চিত শাসকীয় বিজেপি।
অৱশ্যে তৃতীয়খন আসন নিজৰ দখললৈ অনাৰ বাবে কুচ-কাৱাজ অৱ্যাহত ৰাখিছে বিৰোধী কংগ্ৰেছ আৰু AIUDF-এ। তথাপিও যেন সেই আসনৰ প্ৰতি শেন চকু ৰাখিছে বিজেপিয়ে। চলে বলে কৌশলে নিজৰ হাতলৈ সেই আসনখন অনাৰ বাবে চেষ্টা অৱ্যাহত ৰাখিছে বিজেপিয়ে।
তৃতীয়খন আসনত জয়ী হ’বলৈ প্ৰাৰ্থীগৰাকীক প্ৰয়োজন হয় ৩২ টা ভোট। বিজেপি আৰু মিত্ৰজোঁটৰ হাতত আছে ২৩টা ভোট। তৃতীয়খন আসনত বিজেপি প্ৰাৰ্থী জয়ী হ’বলৈ মাথো প্ৰয়োজন হ’ব ৯ টা ভোট।
তৃতীয়খন আসনৰ বাবে বিজেপিয়ে জ্যেষ্ঠ বিজেপি নেতা তথা প্ৰাক্তন সাংসদ ৰাজেন গোহাঁই, ৰমেন ডেকা বা ৰাজ্যিক বিজেপিৰ মুখপাত্ৰ সুভাষ দত্তক দিয়াৰ পূৰ্ণ সম্ভাৱনা আছে। কাইলৈ বিজেপিয়ে প্ৰকাশ কৰিব এই নাম।
কংগ্ৰেছৰ এক উচ্চস্তৰীয় সূত্ৰই প্ৰকাশ কৰা মতে জ্যেষ্ঠ সাংবাদিক অজিত কুমাৰ ভূঞা কংগ্ৰেছ AIUDFৰ উমৈহতীয়া প্ৰাৰ্থী হোৱা বাবে অসন্তুষ্ট বহুকেইজন বিধায়ক তথা জ্যেষ্ঠ নেতা। এইক্ষেত্ৰত বহু বিধায়ক ভোটদানৰ পৰা আঁতৰি থকাৰ সম্ভাৱনা আছে। তদুপৰি কিছুসংখ্যক বিধায়কে নিজৰ ভোট কেঞ্চেল কৰাৰ সম্ভাৱনা প্ৰকট হৈ পৰিছে।
যদি সূত্ৰটোৱে দাবী কৰা মতে হয়, তেন্তে কংগ্ৰেছ AIUDFৰ উমৈহতীয়া প্ৰাৰ্থী পৰাজিত হোৱাৰ সম্ভাৱনা নুই কৰিব নোৱাৰি।
ইপিনে, বিজেপিয়ে প্ৰথম আসনৰ পৰা প্ৰাক্তন কংগ্ৰেছীক অগ্ৰাধিকাৰ দিয়াক লৈ চৰ্চা হৈছে। অসমৰ পৰা ভূৱনেশ্বৰ কলিতা আৰু মধ্যপ্ৰদেশৰ পৰা সদ্য পদত্যাগী কংগ্ৰেছী জ্যোতিৰাদিত্য সিন্ধিয়াক প্ৰাৰ্থীত্ব দিছে বিজেপি। এনেক্ষেত্ৰত অন্য জ্যেষ্ঠ বিজেপি নেতা বঞ্চিত হোৱাৰ গুৰুতৰ অভিযোগ উত্থাপিত হৈছে। এই সন্দৰ্ভত বিজেপিত পুৰণি তথা জ্যেষ্ঠ নেতাৰ অভাৱ নেকি বুলি একাংশই প্ৰশ্ন কৰিছে।
