বি টি চিত পৰিষদীয় নিৰ্বাচনৰ কুছকাৱাজৰ মাজতে চিৰাঙৰ কাজলগাঁৱত বুধবাৰে ইউ পি পি এলৰ এটা নিৰ্বাচনী কাৰ্য্যালয়ত দুৰ্বৃত্তই অগ্নিসংযোগ কৰিছে।
১৫ নং কাজলগাওঁ পৰিষদীয় সমষ্টিৰ ঢালিগাঁও থানাৰ অন্তৰ্গত অন্তৰ্গত বিৰহাংগাওঁ প্ৰাইমাৰী ইউ পি পি এল দলৰ নিৰ্বাচনী কাৰ্য্যালয়ত নিশা অচিনাক্ত দুৰ্বৃত্তই অগ্নিসংযোগ কৰে।
নিৰ্বাচনী আচৰণ বিধি বলৱৎ হৈ থকাৰ মাজতে সংঘটিত ঘটনাটোত কাৰ্য্যালয়টোৰ বিশেষ ক্ষতিসাধন হোৱা নাই।
ঘটনাস্থলীত আৰক্ষীৰ উচ্চ পদস্থ বিষয়া উপস্থিত হৈছে আৰু তদন্ত আৰম্ভ কৰিছে।
এতিয়ালৈকে কাকো আটক কৰাৰ খবৰ পোৱা হোৱা নাই।
খবৰ মতে, ৰাতি প্ৰায় ১০ বজালৈকে কাৰ্য্যালয়টোত দলীয় কৰ্মীসকল আছিল।
কৰ্মীসকল আঁতৰি যোৱাৰ পিছতে নিশা দুৰ্বৃত্তই কাৰ্য্যালয়টোত অগ্নিসংযোগ কৰে।
ইপিনে উক্ত ঘটনাৰ তীব্ৰ নিন্দা কৰিছে কাজলগাওঁ পৰিষদীয় সমষ্টিৰ এম চি এল এ ৰৌনগৌৰা নাৰ্জাৰীয়ে।
নাৰ্জাৰীয়ে কয় কোনোবাই যদি ৰাজনৈতিক স্বাৰ্থ আঁৰত ৰাখি এনেধৰণৰ কাম কৰিছে, তাৰ উপযুক্ত তদন্ত হ’ব লাগে লগতে উক্ত ঘটনাৰ সৈতে জড়িত অপৰাধীক কৰায়ত্ত কৰি শাস্তি প্ৰদান কৰিব লাগে।
এনেধৰণৰ ঘটনাৰ আগলৈ যাতে পুনৰাবৃত্তি নঘটে তাৰ বাবে প্ৰশাসনৰ ফালৰ পৰা নিশ্চিতি প্ৰদান কৰাৰ বাবেও তেওঁ দাবী জনায়।
অহা ৪ এপ্ৰিলত বি টি চিৰ পৰিষদীয় নিৰ্বাচনৰ ভোটগ্ৰহণ অনুষ্ঠিত হ’ব।
৮ এপ্ৰিলত ভোট গণনা আৰম্ভ হ’ব।
