কৰ’নাভাইৰাছে সৃষ্টি কৰা পৰিস্থিতিৰ বাবে NEET UG (National Eligibility cum Entrance Test-Under Graduate) পৰীক্ষা পিছুৱাই দিয়া হৈছে।
পূৰ্বৰ সূচীমতে ৩ মে’ত অনুষ্ঠিত হ’ব লগা পৰীক্ষাটো মে’ৰ অন্তিম সপ্তাহলৈ পিছুৱাই দিয়া হৈছে।
পৰীক্ষাটোৰ দিন এতিয়াই ঘোষণা কৰা হোৱা নাই। নেচনেল টেষ্টিং এজেন্সিয়ে জাৰি কৰা জাননী মতে পৰিস্থিতিৰ পৰ্য্যালোচনাৰ পিছত পৰৱৰ্তী সময়ত সঠিক তাৰিখ ঘোষণা কৰা হ’ব।
একেদৰে পৰীক্ষাটোৰ প্ৰৱেশ পত্ৰসমূহো ১৫ মে’ৰ পিছত পৰিস্থিতিৰ পুনৰ পৰ্য্যালোচনাৰ অন্ততহে দিয়া হ’ব।
দেশজোৰা লকডাউনৰ বাবেই মানৱ সম্পদ উন্নয়ন মন্ত্ৰ্যালয়ে এই সিদ্ধান্ত গ্ৰহণ কৰিছে।
শুকুৰবাৰলৈকে দেশত কৰ’নাভাইৰাছ আক্ৰান্তৰ সংখ্যা ৭২৪লৈ বৃদ্ধি পাইছে। চিনাক্ত ৰোগীসকলৰ ভিতৰত আছে ৪৭ গৰাকী বিদেশী নাগৰিক।
কৰ’নাভাইৰাছত আক্ৰান্ত হৈ ১৭ গৰাকী লোক মৃত্যুমুখত পৰিছে। ৬৭ গৰাকী ৰোগীক চিকিৎসাৰ অন্তত যাবলৈ দিয়া হৈছে।
কেৱল বৃহস্পতিবাৰৰ দিনটোতে ৮৫ গৰাকী নতুন কৰ’নাভাইৰাছ আক্ৰান্ত চিনাক্ত হৈছে। আন্দামান আৰু নিকোবৰত প্ৰথমগৰাকী ৰোগী চিনাক্ত হৈছে।
মণিপুৰ আৰু মিজোৰামত এগৰাকীকৈ ৰোগী চিনাক্ত হোৱাৰ পিছত অসমকে ধৰি উত্তৰ-পূবত কোনো নতুন ৰোগী চিনাক্ত হোৱা নাই।
কৰ’নাভাইৰাছত আটাইতকৈ বেয়াকৈ ক্ষতিগ্ৰস্ত হৈছে কেৰালা আৰু মহাৰাষ্ট্ৰ। কেৰালাত কৰ’নাভাইৰাছ আক্ৰান্ত ১৩৭ গৰাকীলৈ বৃদ্ধি পাইছে। মহাৰাষ্ট্ৰত এই সংখ্যা হৈছে ১৩০ (।)
কৰ্নাটকত ৫৫ গৰাকী কৰ’নাভাইৰাছ আক্ৰান্ত চিনাক্ত হৈছে। তেলেংগানাত ৪৫ গৰাকী ৰোগী চিনাক্ত হোৱাৰ বিপৰীতে গুজৰাটত চিনাক্ত হৈছে ৪৩ গৰাকী।
ৰাজস্থান আৰু পঞ্জাৱত ক্ৰমে ৩৯ আৰু ৩৩ গৰাকী ৰোগী চিনাক্ত হৈছে।
উত্তৰ প্ৰদেশত ৪০, দিল্লীত ৩৫, তামিল নাডুত ২৩ আৰু মধ্য প্ৰদেশত ২০ গৰাকী কৰ’নাভাইৰাছত আক্ৰান্ত চিনাক্ত হৈছে।
হাৰিয়ানাত ১৬, অন্ধ্ৰ প্ৰদেশত ১২ আৰু জম্মু-কাশ্মীৰ আৰু লাডাখত ১৩ গৰাকীকৈ কৰ’নাভাইৰাছ আক্ৰান্ত চিনাক্ত হৈছে।
পশ্চিম বংগত দহ, চণ্ডীগড়ত সাত, বিহাৰত ছয়, ছত্তিশগড়ত ছয়, উত্তৰাখণ্ডত চাৰি, গোৱাত তিনি, ওড়িছাত দুই আৰু পুডুচেৰিত এগৰাকী ৰোগী চিনাক্ত হৈছে।
সমগ্ৰ বিশ্বত এতিয়ালৈকে পাঁচলাখৰো অধিক লোক কৰ’নাভাইৰাছত আক্ৰান্ত হৈছে। ২৩ হাজাৰতকৈয়ো অধিক লোকৰ এই ৰোগত মৃত্যু ঘটিছে।
আমেৰিকাত ৮৩,০০০তকৈয়ো অধিক লোক আক্ৰান্ত হৈছে। এই সংখ্যাই চীন, ইটালিকো চেৰাই গৈছে।
ভাৰতত কৰ’নাভাইৰাছক প্ৰতিহত কৰাৰ বাবে প্ৰধান মন্ত্ৰী নৰেন্দ্ৰ মোদীয়ে ২১ দিনৰ লকডাউন ঘোষণা কৰিছে।
