অসমৰ মুখ্য মন্ত্ৰী সৰ্বানন্দ সোণোৱালে সোমবাৰে বৰপেটাৰ ফকৰুদ্দিন আলি আহমেদ চিকিৎসা মহাবিদ্যালয় আৰু হস্পিটেল পৰিদৰ্শন কৰি COVID-19ৰ বিৰুদ্ধে প্ৰস্তুতিৰ বুজ লয়।
মুখ্য মন্ত্ৰীগৰাকীয়ে চিকিৎসা মহাবিদ্যালয়খনতে দুখন বৈঠকত ভাগ লয়। তেওঁ জিলা উপায়ুক্ত আৰু অন্যান্য জ্যেষ্ঠ বিষয়াসকলৰ সৈতে পৰিস্থিতি সন্দৰ্ভত আলোচনা কৰে।
চিকিৎসালয়খনৰ চিকিৎসক আৰু কৰ্মচাৰীসকলৰ সৈতেও সোণোৱাল আন এক বৈঠকত মিলিত হয়।
COVID-19ৰ বিৰুদ্ধে প্ৰস্তুতিৰ বুজ লৈ তেওঁ সকলো চিকিৎসক আৰু কৰ্মচাৰীকে আশ্বাস প্ৰদান কৰে যে ৰাজ্য চৰকাৰে কৰ’নাভাইৰাছৰ বিৰুদ্ধে যুঁজিবলৈ সম্ভৱপৰ সকলো সহায় আগবঢ়াব।
কৰ’নাভাইৰাছক প্ৰতিহত কৰাৰ বাবে জিলাখনৰ লোকসকলে নিজকে ঘৰতে আবদ্ধ ৰাখি সহায়ৰ হাত আগবঢ়োৱা বুলিও তেওঁ মন্তব্য কৰে।
উল্লেখযোগ্য যে সোমবাৰে বৰপেটাৰ ফকৰুদ্দিন আলি আহমেদ চিকিৎসা মহাবিদ্যালয় আৰু হস্পিটেলৰ পৰীক্ষাগাৰক COVID-19 পৰীক্ষাৰ বাবে স্বীকৃতি দিয়া হৈছে।
স্বাস্থ্য মন্ত্ৰী হিমন্ত বিশ্ব শৰ্মাই সদৰী কৰা মতে ভাৰতীয় চিকিৎসা গৱেষণা পৰিষদে পৰীক্ষাগাৰটোক এই স্বীকৃতি প্ৰদান কৰে।
এই স্বীকৃতিৰ ফলত ৰাজ্যত মাৰাত্মক ভাইৰাছবিধৰ পৰীক্ষা কৰিব পৰা পৰীক্ষাগাৰ পাঁচটালৈ বৃদ্ধি পালে।
ইয়াৰ পূৰ্বে গুৱাহাটী, ডিব্ৰুগড়, যোৰহাট আৰু শিলচৰৰ চিকিৎসা মহাবিদ্যালয়কেইখনত COVID-19 পৰীক্ষাৰ ব্যৱস্থা কৰা হৈছিল।
অসমত এতিয়ালৈকে কোনো কৰ’নাভাইৰাছ আক্ৰান্ত চিনাক্ত হোৱা নাই যদিও দেশৰ প্ৰায়ভাগ ৰাজ্যতে এই ৰোগী চিনাক্ত হৈছে।
প্ৰধান মন্ত্ৰী নৰেন্দ্ৰ মোদীয়ে মাৰাত্মক কৰ’নাভাইৰাছ প্ৰতিহত কৰাৰ বাবে ২১ দিনীয়া দেশজোৰা লকডাউন ঘোষণা কৰিছে।
ভাৰতীয় চিকিৎসা গৱেষণা পৰিষদৰ মতে দেশত কৰ’নাভাইৰাছ আক্ৰান্তৰ সংখ্যা দ্ৰুতগতিত বৃদ্ধি পাইছে যদিও ই এতিয়াও সামূহিক সংক্ৰমণৰ পৰ্য্যায় পোৱাগৈ নাই।
যোৱা ২৪ ঘণ্টাত দেশত নতুনকৈ ৯২ গৰাকী কৰ’নাভাইৰাছ আক্ৰান্ত চিনাক্ত হৈছে।
মণিপুৰ আৰু মিজোৰামত এগৰাকীকৈ ৰোগী চিনাক্ত হোৱাৰ পিছত অসমকে ধৰি উত্তৰ-পূবত কোনো নতুন ৰোগী চিনাক্ত হোৱা নাই।
দেশত কৰ’নাভাইৰাছ আক্ৰান্তৰ সংখ্যা ১০৭১লৈ বৃদ্ধি পাইছে। আক্ৰান্ত ২৯ গৰাকী লোক মৃত্যুমুখত পৰিছে।
স্বাস্থ্য আৰু পৰিয়াল কল্যাণ মন্ত্ৰ্যালয়ৰ তথ্য মতে কৰ’নাভাইৰাছত আক্ৰান্ত দেশৰ ১০০ গৰাকী ৰোগী সুস্থ হৈছে।
বিশ্বজুৰি সাত লাখতকৈয়ো অধিক লোক এই মাৰাত্মক ভাইৰাছবিধত আক্ৰান্ত হৈছে।
৩৩ হাজাৰতকৈয়ো অধিক লোকৰ এই ৰোগত মৃত্যু ঘটিছে।
