সমগ্ৰ বিশ্বতে কৰ’না ভাইৰাছৰ সংক্ৰমণে এক প্ৰকাৰ সন্ত্ৰাসৰ সৃষ্টি কৰাৰ সময়ত বিশ্বৰ ধনী আৰু সম্পদশালী দেশসমূহেও কৰ’নাৰ গ্ৰাসত দিকবিদিক হেৰুৱাবলগীয়া হৈছে।
আমেৰিকা, ব্ৰিটেইনকে ধৰি য়ুৰোপৰ বহুকেইখন দেশ কৰ’নাৰ কৰাল গ্ৰাসত পৰি অস্থিৰ হৈ পৰাৰ সময়ত আন এক সম্পদশালী তথা ধনী ৰাষ্ট্ৰ চৌদি আৰৱতো কৰ’না ভাইৰাছে সন্ত্ৰাসৰ সৃষ্টি কৰিছে।
জানিব পৰা মতে, কৰ’না ভাইৰাছৰ কবলত পৰিছে চৌদি আৰৱৰ ৰাজ পৰিয়ালৰ কমেও ১৫০জন সদস্য।
বিগত সপ্তাহতেই এই পৰিয়ালৰ কেইগৰাকীমান সদস্য COVID-19ত সংক্ৰমিত হয়। ৰাজ পৰিয়ালটোৰ চিকিৎসকৰ ফালৰ পৰাই এই খৱৰ সদৰী কৰা হৈছে।
আক্ৰান্তসকলৰ মাজত ৭০ বৰ্ষীয় ৰিয়াধৰ গৱৰ্ণৰ প্ৰিন্স ফইছাল বিন বান্দাৰ বিন আব্দুল আজিজ অল ছাউদ COVID-19ত আক্ৰান্ত হৈ আই চি য়ুত ভৰ্তি হৈ আছে।
ইপিনে, COVID-19ৰ সংক্ৰমণৰ পৰা হাত সাৰিবলৈ চৌদিৰ বাদশ্বাহ ছলমান আৰু যুৱৰাজ মহম্মদ বিন ছলমানে নিজেই আইছ’লেশ্যনত আছে।
আনহাতে, চৌদিৰ ৰাজ পৰিয়ালৰ চিকিৎসাৰ বাবে এখন অভিজাত হাস্পাতলত ৫০০খন বিচনা সাজু কৰি ৰখা হৈছে।
চৌদি আৰৱৰ একাধিক যুৱৰাজৰ বহুতেই য়ুৰোপ, আমেৰিকাকে ধৰি বিভিন্ন দেশলৈ প্ৰায়েই ভ্ৰমণ কৰি থাকে। বিদেশত কোনো আক্ৰান্ত ব্যক্তিৰ সংস্পৰ্শলৈ অহাৰ পাছত ৰাজ পৰিয়াললৈ এই ভাইৰাছৰ সংক্ৰমণ বিয়পিছে বুলি অনুমান কৰা হৈছে।
তথ্য অনুসৰি, চৌদি আৰৱত কৰ’না ভাইৰাছত বৰ্তমানলৈকে ২,৯৩২জন লোক আক্ৰান্ত হৈছে আৰু ইয়াৰ ভিতৰত ৪১জন লোকৰ মৃত্যু হৈছে।
