সৰ্বত্ৰে নৰ সংহাৰী ক’ৰ’নাৰ আতংক।
এনে এক সময়তে উত্তৰ প্ৰদেশৰ নয়ডাত ক’ৰ’নাতংকৰ বাবে সংঘটিত হৈছে এক দুৰ্ভাগ্যজনক ঘটনা। যোৱা মঙলবাৰে সংঘটিত ঘটনাটো শেহতীয়াকৈ পোহৰলৈ আনিছে সংবাদ প্ৰতিষ্ঠান পি টি আইএ।
স্থানীয় আৰক্ষী সূত্ৰৰ উদ্ধৃতি দি সংবাদ প্ৰতিষ্ঠান পি টি আইক প্ৰকাশ কৰিছে যে এজন লোকে লুডু খেলি থকা নিজৰ ২৫ বছৰীয়া সতীৰ্থগৰাকীকে গুলীয়াই আহত কৰে নয়ডাত। ঘটনাটো সংঘটিত হৈছে নয়ডাৰ দয়ানগৰ মন্দিৰত।
ঘটনাৰ বিৱৰণী অনুসৰি নয়ডাৰ দয়ানগৰ মন্দিৰত লুডু খেলি থকা অৱস্থাত এজনে কহাক লৈ দুজন লোক বাক-বিতণ্ডাত লিপ্ত হোৱাৰ পিছত কাজিয়াৰ সূত্ৰপাত হয়।
আৰক্ষীই সূত্ৰৰ উদ্ধৃতিৰে পি টি আইএ প্ৰকাশ কৰিছে যে ২৫ বছৰীয়া প্ৰশান্ত সিং ওৰফে প্ৰৱেশে কাহি দিয়াত সতীৰ্থ জাৰ্চা সিং ওৰফে গুলু নামৰ ৩০ বছৰীয়া লোকজনে ক’ৰ’না সংক্ৰমণৰ আতংকত প্ৰশান্তৰ লগত বাক বিতণ্ডাত লিপ্ত হয়। বাক বিতণ্ডাৰ পিছতে উত্তেজিত হৈ গুলুৱে প্ৰশান্ত নামৰ লোকজনক গুলীয়াই আহত কৰে।
আহত প্ৰশান্তক ইতিমধ্যে হাস্পতালত ভৰ্তি কৰাই চিকিৎসা প্ৰদান কৰি থকা হৈছে। তেওঁ এতিয়া সংকটমুক্ত বুলি জানিব পৰা গৈছে।
আহত প্ৰশান্তৰ এজাহাৰৰ ভিত্তিত ইতিমধ্যে অভিযুক্ত গুলুক আৰক্ষীয়ে গ্ৰেপ্তাৰ কৰিছে।
উল্লেখ্য যে, কাহ মৰাটো ক’ৰ’না ভাইৰাছ সংক্ৰমণৰ অন্যতম লক্ষণ হোৱাৰ ফলতে আতংকগ্ৰস্ত হৈ গুলু নামৰ লোকজনে এই কাণ্ড সংঘটিত কৰিলে বুলি আৰক্ষীয়ে প্ৰকাশ কৰিছে।
