ক’ভিড-১৯ত আক্ৰান্ত অসমৰ চাৰিজন ব্যক্তিক শুকুৰবাৰে চিকিৎসালয়ৰ পৰা মুকলি কৰি দিয়া হৈছে।
স্বাস্থ্য মন্ত্ৰী হিমন্ত বিশ্ব শৰ্মাৰ উপস্থিতিত হাইদৰ আলি (৬২), ৱাহিদা বেগম (৩০), য়াকুব আলি (৫১) আৰু ৰুমা বেগম (৩৮)ক চিকিৎসালয়ৰ পৰা মুকলি কৰা হয়।
গোলাঘাট শ্বহীদ কুশল কোঁৱৰ অসামৰিক চিকিৎসালয়ৰ পৰা তেওঁলোকক মুকলি কৰি দিয়া হৈছে।
স্বাস্থ্য মন্ত্ৰীয়ে সদৰী কৰা মতে তেওঁলোকৰ তেজ, স্বব আৰু এক্স ৰে’কে ধৰি সকলো পৰীক্ষা কৰোৱা হৈছে আৰু তেওঁলোকৰ নমুনা নিগেটিভ পোৱা গৈছে।
তেওঁ লগতে জনাই যে ব্যক্তিকেইজনৰ নমুনা আই চি এম আৰ লাহোৱালৰ পৰীক্ষাগাৰতো পৰীক্ষা কৰোৱা হৈছিল।
ব্যক্তি চাৰিগৰাকীৰ মুক্তিৰ পিছত চিকিৎসালয়খনত বৰ্তমান আৰু পাঁচগৰাকী ক’ভিড-১৯ পজিটিভ ৰোগী চিকিৎসাধীন হৈ আছে।
স্বাস্থ্য মন্ত্ৰীগৰাকীয়ে জিলাখনৰ আটাইকেইজন চিকিৎসাধীন ৰোগীকে ২২ বা ২৩ এপ্ৰিলৰ ভিতৰত মুকলি কৰিব পৰা হ’ব বুলি তেওঁ আশা প্ৰকাশ কৰে।
আনহাতে, নিৰ্মাণ সম্পূৰ্ণ হোৱা গোলাঘাটৰ মাতৃ আৰু শিশু চিকিৎসালয়খন শুকুৰবাৰৰ পৰা সম্পূৰ্ণৰূপে ক’ভিড-১৯ চিকিৎসালয়লৈ উন্নীত কৰা হয়।
মন্ত্ৰী শৰ্মাই কয় যে গোলাঘাট জিলাৰ এই বিশেষ ক’ভিড-১৯ চিকিৎসালয়খনত ৫৬খন কুৱাৰেণ্টাইন বিচনা, ৪০খন আছুতীয়া বিচনা আৰু ২৪খন আই চি ইউ বিচনা থাকিব।
লগতে কৰ’নাভাইৰাছ শেষ হ’লে গোলাঘাটৰ অসামৰিক চিকিৎসালয়খন ভাঙি নতুনকৈ ৩০০ বিচনাযুক্ত এক চিকিৎসালয় নিৰ্মাণ কৰাৰ পৰিকল্পনা কৰা হৈছে বুলিও মন্ত্ৰীজনে প্ৰকাশ কৰে।
গোলাঘাট জিলাৰ চাৰিগৰাকী ব্যক্তিক ধৰি অসমত এতিয়ালৈকে নগৰাকী ব্যক্তিয়ে ক’ভিড-১৯ৰ পৰা আৰোগ্য লাভ কৰিলে।
ইয়াৰ পূৰ্বে যোৱা দুদিনত সোণাপুৰ অসামৰিক চিকিৎসালয়ৰ পৰা দুগৰাকী আৰু গোৱালপাৰা অসামৰিক চিকিৎসালয়ৰ পৰা তিনিজন সুস্থ ব্যক্তিক যাবলৈ দিয়া হৈছিল।
অসমত ক’ভিড-১৯ আক্ৰান্ত এজন ব্যক্তিৰ চিকিৎসাধীন অৱস্থাত মৃত্যু ঘটিছে।
অসমত মুঠ ৩৪ গৰাকী ক’ভিড-১৯ আক্ৰান্ত চিনাক্ত হৈছিল। বৰ্তমান ৰাজ্যত সক্ৰিয় ক’ভিড-১৯ ৰোগীৰ সংখ্যা ২৪ গৰাকী।
