মুখ্য মন্ত্ৰী সৰ্বানন্দ সোণোৱালে আজি মহাৰাষ্ট্ৰৰ মুখ্য মন্ত্ৰী উদ্ধৱ থাকৰে, গুজৰাটৰ মুখ্য মন্ত্ৰী বিজয় ৰূপানী, ৰাজস্থানৰ মুখ্য মন্ত্ৰী অশোক গেহলট, অন্ধ্ৰপ্ৰদেশৰ মুখ্য মন্ত্ৰী ৱাই এছ জগনমোহন ৰেড্ডী, কেৰালাৰ মুখ্য মন্ত্ৰী পি বিজয়ন আৰু কৰ্ণাটকৰ মুখ্য মন্ত্ৰী বি এছ য়েডিয়ুৰাপ্পাৰ সৈতে টেলিফোনযোগে বাৰ্তালাপ কৰি ল’কডাউনৰ সময়ছোৱাত বহিঃৰাজ্য কেইখনত আৱদ্ধ হৈ থকা অসমৰ লোকসকলক সুৰক্ষিত কৰি ৰখা আৰু প্ৰয়োজনীয় সা-সুবিধা আগবঢ়োৱাৰ বিষয় সন্দৰ্ভত আলোচনা কৰে।
বাৰ্তলাপৰ সময়ত সোণোৱালে ক’ৰ’না ভাইৰাছ প্ৰতিৰোধৰ বাবে ৰাষ্ট্ৰজুৰি কাৰ্য্যকৰী হৈ থকা ল’কডাউনৰ ফলত সেই ৰাজ্যকেইখনত অধ্যয়ন কৰি থকা অসমৰ ছাত্ৰ-ছাত্ৰীকে ধৰি বিভিন্ন ক্ষেত্ৰত কৰ্মৰত হৈ থকা ব্যক্তি, চিকিৎসা আরু বিভিন্ন উদ্দেশ্যে ৰাজ্যকেইখনলৈ যোৱা অসমৰ বহু সংখ্যক লোক ইতিমধ্যে আৱদ্ধ হৈ পৰিছে বুলি মন্তব্য কৰে।
অসম চৰকাৰে এই লোকসকলক সহায়-সহযোগিতা আগবঢ়োৱাৰ বাবে নিজাববীয়াকৈ বিভিন্ন পদক্ষেপ গ্ৰহণ কৰিছে যদিও সংশ্লিষ্ট ৰাজ্যকেইখনৰ তৰফৰ পৰা লাভ কৰা সহযোগিতাই এনেদৰে লকডাউনত আবদ্ধ অসমৰ লোকসকলক যথেষ্ট সকাহ দিব।
এই কথা উল্লেখ কৰি অসমৰ এই লোকসকলক সংশ্লিষ্ট ৰাজ্য চৰকাৰ কেইখনে আশ্ৰয়, খাদ্য যোগান, চিকিৎসাকে ধৰি প্ৰয়োজনীয় সকলো সা-সুবিধা যাতে আগবঢ়ায় তাৰ বাবে মুখ্য মন্ত্ৰী সোণোৱালে বাৰ্তালাপৰ সময়ত মুখ্য মন্ত্ৰী কেইগৰাকীক অনুৰোধ কৰে।
অসম চৰকাৰেও অন্য ৰাজ্যৰ পৰা এনে ধৰণৰ পত্ৰ লাভ কৰাৰ কথা মুখ্য মন্ত্ৰী সোণোৱালে বাৰ্তালাপৰ সময়ত উল্লেখ কৰে।
আনহাতে, আলোচনাৰ সময়ত মুখ্য মন্ত্ৰী সোণোৱালে অন্য ৰাজ্যৰ মুখ্য মন্ত্ৰী কেইগৰাকীক আশ্বস্ত কৰি লকডাউনৰ সময়ছোৱাত তেখেতসকলৰ ৰাজ্যৰ যিসকল লোক অসমত আবদ্ধ হৈ আছে তেওঁলোকক সুৰক্ষিত কৰি ৰখাৰ লগতে এই সয়ছোৱাত যাতে তেওঁলোকে কোনো অসুবিধাৰ সন্মুখীন হ’বলগীয়া নহয় সেই সন্দৰ্ভত অসম চৰকাৰে যথোচিত পদক্ষেপ গ্ৰহণ কৰিছে বুলি কয়।
তদুপৰি, আলোচনাৰ সময়ত মুখ্য মন্ত্ৰীয়ে মহাৰাষ্ট্ৰ, গুজৰাট, ৰাজস্থান, অন্ধ্ৰপ্ৰদেশ, কেৰালা, কৰ্ণাটকৰ মুখ্য মন্ত্ৰীৰ সৈতে ক’ৰ’না ভাইৰাছৰ সংক্ৰমণ প্ৰতিৰোধৰ বাবে প্ৰতিখন ৰাজ্য চৰকাৰে গ্ৰহণ কৰা পদক্ষেপ সম্পৰ্কতো আলোচনা কৰে।
