অসমীয়া সমাজ জীৱনৰ এক অন্যতম প্ৰতীক অসমীয়া মাহৰ কেলেণ্ডাৰখন ৷ পৰম্পৰা আৰু লোকবিশ্বাসক মানি অহা বৃহত্তৰ অসমীয়া জাতিয়ে অসমীয়া কেলেণ্ডাৰ খনত থকা বিভিন্ন তাৰিখ তথা বিধানৰ ওপৰত নিৰ্ভৰ কৰি বিবাহ কাৰ্য্য, ঘৰৰ বিভিন্ন শুভ কৰ্মকে ধৰি কৃষি ক্ষেত্ৰত মাটি কহোঁৱা, কঠিয়া ছটিওৱা আদিৰ কাম সুভ দিন-বাৰ চাই কৰি আহিছে৷
অসমীয়া কেলেণ্ডাৰ খনতে উল্লেখিত কিনা-বেচা তাৰিখত বহু অসমীয়া মানুহে ঘৰলৈ কিবা নতুন সম্পদ ক্ৰয় কৰা ইত্যাদি কাম বোৰ কৰে ৷ গাঁও-চহৰ অসমৰ প্ৰতিঘৰ ব্যক্তিৰ ঘৰৰ বেৰত অসমীয়া মাহৰ কেলেণ্ডাৰখন দেখা পোৱা যায়।
এক অৰ্থত অসমীয়া কেলেণ্ডাৰ খন অসমীয়া সমাজৰ অন্যতম এক বাটকটীয়া বুলি কলে বঢ়াই কোৱা নহয়।
কিন্তু এইবাৰ এই ক্ষেত্ৰত ব্যতিক্ৰম ৷ পূৰ্বে চ’ত মাহৰ শেষ ভাগত প্ৰতিজন অসমীয়াৰ কাষ পায়হি এই কেলেণ্ডাৰ। সম্প্ৰতি বিশ্ব বিয়াপি ত্ৰাসৰ সৃষ্টি কৰা ক’ৰ’না ভাইৰাছ সংক্ৰমণ প্ৰতিৰোধৰ বাবে দেশ জুৰি ল’কডাউন চলি থকাত এইবাৰ অসমীয়া মাহৰ কেলেণ্ডাৰ প্ৰকাশত পলম হয় যাৰ বাবে বহাগৰ এটা পষেক অতিক্ৰম কৰাৰ পাছতো কেলেণ্ডাৰখন জনসাধাৰণৰ হাতত পৰা নায়।
আনহাতে, অসমীয়া সমাজ জীৱনত বিভিন্ন ক্ষেত্ৰত দিক্ নিৰ্ণায়কৰ ভূমিকা গ্ৰহণ কৰা অসমীয়া কেলেণ্ডাৰখনৰ অভাৱত এতিয়া অসুবিধাৰ সন্মুখীন হৈছে প্ৰতিজন অসমীয়া বিশেষকৈ গ্ৰাম্যাঞ্চলৰ চহা ৰাইজ।
আশা কৰা হৈছে ল’কডাউন শেষ হোৱাৰ লগে লগে প্ৰায় প্ৰতিঘৰ অসমীয়াৰ ঘৰত নতুন অসমীয়া কেলেণ্ডাৰ খন শোভা বৰ্দ্ধন কৰিব।
