ক’ৰ’না ভাইৰাছৰ সংক্ৰমণৰ সময়ত অসম বিধানসভাৰ বিৰোধী দলপতি নাজিৰা সমষ্টিৰ বিধায়ক দেবব্ৰত শইকীয়াৰ সহধৰ্মিণী তথা অসমৰ প্ৰাক্তন মুখ্য মন্ত্ৰী প্ৰয়াত হিতেশ্বৰ শইকীয়াৰ বোৱাৰী বন্দনা শইকীয়া সম্প্ৰতি মাস্ক চিলাই কৰা কৰ্মত ব্যস্ত হৈ পৰিছে।
সমগ্ৰ বিশ্বত ক’ৰ’না মহামাৰীয়ে সংহাৰী ৰূপ ধাৰণ কৰাৰ সময়ত মাস্ক পৰিধান কৰি এই মহামাৰীৰ সংক্ৰমণ ৰোধৰ কৰাৰ ক্ষেত্ৰত ব্যৱস্থা গ্ৰহণৰ হকে বিৰোধী দলপতি শইকীয়াৰ পত্নীয়ে এনেদৰে হাতে-কামে মাস্ক প্ৰস্তুত কৰা কাৰ্য্যত লাগি যোৱা দৃশ্যই সকলোকে উৎসাহিত কৰাৰ লগতে মাস্ক পৰিধানৰ গুৰুত্বৰ ওপৰত সজাগ কৰি তুলিছে।
শেহতীয়াভাৱে, সমগ্ৰ দেশৰ লগতে ৰাজ্যবাসীকো ক’ৰ’না ভাইৰাছৰ সন্ত্ৰাসে চিন্তাত নিমগ্ন কৰি কৰি পেলাইছে সেই সময়ত এই গৰাকী সমাজ সচেতন মহিলাই তেখেতসকলৰ সমষ্টিবাসীৰ প্ৰতি চিন্তিত হৈ হাতে-কামে যুদ্ধ ক্ষেত্ৰত নামি পৰিছে।
উল্লেখযোগ্য যে, ল’কডাউনৰ বাবে যিহেতু ব্যৱসায়িক প্ৰতিষ্ঠান সমূহ বন্ধ হৈ আছে সেয়েহে বন্দনা শইকীয়াই স্বগৃহত নিজেই মাস্ক চিলাই কৰি সমষ্টিবাসীৰ মাজত বিনামুলীয়াকৈ বিতৰণৰ ব্যৱস্থা কৰি দায়বদ্ধতাৰ পৰিচয় দিছে।
সমাজৰ প্ৰতি থকা তেখেতৰ এনে দায়বদ্ধতা সমষ্টিবাসীৰ বাবে এতিয়া আদৰ্শস্বৰূপ হৈ পৰিছে।
বৰ্তমানলৈ অসমত মুঠ ৪২ গৰাকী লোক ক’ৰ’নাত আক্ৰান্ত হোৱাৰ বিপৰীতে এগৰাকী লোকৰ মৃত্যু হৈছে।
আনহাতে, ৩২ গৰাকী লোক চিকিৎসাৰ অন্তত সুস্থ হৈ চিকিৎসালয়ৰ পৰা মুক্তি লাভ কৰি স্বগৃহলৈ উভতিছে।
