দিল্লীস্থত কেন্দ্ৰীয় সংৰক্ষিত আৰক্ষী বাহিনীৰ এটা বেটেলিয়নৰ ১০০ ৰো অধিক জোৱানৰ শৰীৰত কোভিড১৯ পজিটিভ পোৱা গৈছে। সংবাদ এজেঞ্চি পিটিআইএ প্ৰকাশ কৰিছে এই তথ্য।
সংবাদ এজেঞ্চি পিটিআইৰ বাতৰি অনুসৰি দিল্লীৰ ময়ুৰ বিহাৰস্থিত চি আৰ পি এফৰ ৩১নং বেটেলিয়নৰ ১০০০ গৰাকী জোৱানৰ ভিতৰত ১২২ গৰাকী জোৱানৰ শৰীৰত কোভিড১৯ পজিটিভ পোৱা গৈছে।
দেশৰ বৃহত্তম পেৰামেলিটাৰি বাহিনীটোৰ ১২ গৰাকী জোৱান যোৱা সপ্তাহত কোভিড১৯ পজিটিভ পোৱাৰ লগতে ৫৫ উৰ্দ্ধৰ এগৰাকী উপ পৰিদৰ্শকৰ মত্যুও ঘটিছিল।
‘এই বেটেলিয়নটোৰ ১২২ গৰাকী জোৱানৰ শৰীৰত কোভিড১৯ পজিটিভ পোৱা গৈছে। আৰু ১০০ গৰাকী জোৱানৰ স্বাস্থ্যৰ নমুনাৰ পৰীক্ষা আহিবলৈ বাকী আছে।’ চি পি আৰ পিৰ এফৰ সূত্ৰৰ উদ্ধৃতিৰে এইদৰে পিটিআইএ প্ৰকাশ কৰিছে।
দিল্লীৰ ময়ুৰ বিহাৰৰ মণ্ডুলীত জোৱানসকলক আইছলেশ্যনত ৰখা হৈছে।
বেটেলিয়নটোৰ নাৰ্ছিঙৰ এজন কনিষ্টবলৰ পৰা কোভিড১৯ৰ সংক্ৰমণৰ সন্দেহ কৰিছে বাহিনীটোৰ কৰ্তৃপক্ষই। দিল্লীৰে কনিষ্টবলজনে নিজৰ ছুটী শেষ কৰি শেহতীয়াকৈ কৰ্তব্যত যোগদান কৰিছিল।
কনিষ্টবলজনে ইয়াৰ পূৰ্বে বাহিনীটোৰ জন্মু-কাশ্মীৰৰ কুপৱাৰাৰ এটা বেটেলিয়নতো কৰ্তব্যৰত আছিল যদিও তেওঁ কেনেকৈ কোভিড১৯ৰে সংক্ৰমিত হ’ল সেয়া এতিয়া নিশ্চিত কৰিব পৰা হোৱা নাই। কনিষ্টবলৰ পৰিয়ালৰ সকলোৰে স্বাস্থ্য পৰীক্ষাৰ নিগেটিভ ৰিজাল্ট উলাইছে বুলি জানিব পৰা গৈছে।
আনহাতে চি আৰ পি এফৰ পৰিচালন সঞ্চালক এ পি মহেশ্বৰীয়ে এপ্ৰিল মাহৰ পৰা চেল্ফ কোৱাৰেণ্টাইনত আছে।
