পুৱা ১১ বজাৰ লগে লগে আজিৰে পৰা মুকলি হ’ল ৰাজ্যৰ সুৰাৰ বিপণিসমূহ। কালি আবেলিৰে পৰা সুৰাৰ বিপণিসমূহ মুকলি কৰি দিয়া হৈছিল যদিও বহু সুৰাপায়ীয়ে ক্ৰয় কৰিব নোৱাৰিলে সুৰা।
গতিকে সকলোৱে যেন দেওবাৰৰ দিনটোত ১১ বজালৈ আশাৰে বাট চাই ৰ’ল। সুৰাৰ বিপণিৰ চাটাৰ মুকলি হোৱাৰ লগে লগে সকলো সুৰাপায়ীৰ মুখলৈ যেন পানী আহিল।
দীৰ্ঘদিন ধৰি ডিঙিটো টিয়াবলৈ নোপোৱা সুৰাপায়ীসকলে যেন স্বস্তিৰ নিশ্বাস পেলালে। সেয়েহে পুৱাৰে পৰা মহানগৰীৰ সুৰাৰ বিপণিৰ সন্মুখত শিক্ষকৰ একান্ত বাধ্য ছাত্ৰৰ দৰে থিয় হ’ল সুৰাপায়ী।
সকলো সুৰাপায়ীয়ে পালন কৰিলে চৰকাৰ বা প্ৰশাসনে বান্ধি দিয়া নীতি নিৰ্দেশনা। সামাজিক ব্যৱধান মানি সকলোৱে ১ মিটাৰতকৈ অধিক দূৰত্ব বজাই ৰাখি দুপৰীয়াৰ ৰ’দৰ তাপ সহ্য কৰিও সুৰা ক্ৰয়ৰ বাবে শাৰী পাতি থিয় হ’ল।
যি সামাজিক দূৰত্ব শাক-পাচলি ক্ৰয় কৰাৰ সময়ত দেখিবলৈ পোৱা নগ’ল সেয়া দেখা গ’ল সুৰাৰ বিপণিৰ সন্মুখত। সামাজিক ব্যৱধান নামানিলে অন্য উপায়ো নাই যেন সুৰাপায়ীৰ মাজত। পূৰ্বৰ দৰে আৱকাৰী বিভাগৰ খং উঠিলে পুনৰ বন্ধ কৰি দিব পাৰে বিপণিসমূহ। সেয়েহে যিমানখিনি পাৰে সিমানখিনি নিয়মানুবৰ্তিতা মানি চলিলে সুৰাপাায়ী গ্ৰাহকে।
আনহাতে, উলুবাৰীৰ এখন ৱাইন শ্বপৰ সন্মুখত সাংবাদিকৰ কেমেৰা দেখি বৰ লাজ লাগিল সুৰাপায়ী গ্ৰাহকৰ। সেয়েহে মূৰতো তললৈ কৰি কেমেৰাৰ ফালে পিছফাল দেখুৱাই শাৰীত থিয় দিলে এইসকল সুৰাপায়ী গ্ৰাহক।
প্ৰশ্ন হয়, মদ খোৱাটো জানো অপৰাধ হ’ব পাৰে?
ইপিনে, আপুনি হয়তো ন’ মাস্ক ন’ পেট্ৰ’ল বুলি তেল ডিপোসমূহত দেখিছে। পিছে এইবাৰ মহানগৰীৰ এখন বিশেষ ৱাইন শ্বপে লৈছে এই পদক্ষেপ। উলুবাৰীস্থিত এইছ.ডি ৱাইন শ্বপৰ স্বত্তাধিকাৰীয়ে মাস্ক পৰিধান কৰি নহা সুৰপাপায়ী গ্ৰাহকক ওভটাই পঠালে ৱাইন শ্বপৰ পৰা।
উল্লেখযোগ্য যে, আজিৰে পৰা পুৱা ১১ বজাৰ পৰা বিয়লি ৫ বজালৈকে ৰাজ্যৰ ৱাইনশ্বপসমূহ খোলাৰ অনুমতি প্ৰদান কৰিছে ৰাজ্য চৰকাৰে।
