মুখ্য মন্ত্ৰী সৰ্বানন্দ সোণোৱালে আজি অসম গ্ৰামীণ অভিযানৰ অন্তৰ্গত কামৰূপ মহানগৰ জিলা আৰু চন্দ্ৰপুৰ খণ্ড অভিযান পৰিচালনা গোটৰ আত্মসহায়ক গোটসমূহৰ দ্বাৰা পৰিচালিত চন্দ্ৰপুৰৰ তাতীমৰাস্থিত মাস্ক উৎপাদন কেন্দ্ৰ পৰিদৰ্শন কৰি এই কাৰ্য্যত জড়িত হৈ থকা আত্মসহায়ক গোটৰ সদস্যাসকলৰ সৈতে মত-বিনিময় কৰাৰ উপৰি তেওঁলোকক উৎসাহিত কৰে।
মুখ্য মন্ত্ৰীয়ে আত্মসহায়ক গোটৰ সহস্যাসকলক মাস্ক উৎপাদনৰ দৰে কাম-কাজ নিষ্ঠাৰে পালন কৰি কোভিড-১৯-ৰ সংক্ৰমণ প্ৰতিহত কৰাৰ দিশত তেওঁলোকে বলিষ্ঠ অৰিহণা আগবঢ়াই আছে বুলিও কয়।
উল্লেখ্য যে, ক’ৰ’না ভাইৰাছৰ সংক্ৰমণৰ পিছৰে পৰা ৰাজ্যখনৰ ১০,৬৫৯ টা আত্ম সহায়ক গোটৰ মহিলা সদস্যাই এতিয়ালৈকে সৰ্বমুঠ ৫১,২৩,১৯৪ টা মাস্ক প্ৰস্তুত কৰিছে।
ইতিমধ্যে ইয়াৰে ৩১,৭১,৩১৪ খন মাস্ক বিক্ৰী কৰা হৈছে। এতিয়ালৈকে অসমৰ ৩৩ খন জিলাত ৮৪ খন মাস্কৰ বিপনী খোলা হৈছে আৰু অসমী ব্ৰেণ্ডেৰে নামাকৰণ কৰা এই মাস্ক বিক্ৰী কৰি আত্মসহায়ক গোটসমূহে ৭.১৫ কোটি টকা আহৰণ কৰিবলৈ সক্ষম হৈছে। তদুপৰি ৪,২২,৬২৫ খন মাস্ক বিনামূলীয়াভাৱে বিতৰণ কৰা হৈছে।
পৰিদৰ্শনৰ পাছত উৎপাদন কেন্দ্ৰ চৌহদত উপস্থিত থকা সাংবাদিকসকলৰ সৈতে হোৱা কথা-বতৰাত মুখ্য মন্ত্ৰী সোণোৱালে কয় যে, কোভিড-১৯ৰ ঔষধ আৰু প্ৰতিষেধক আৱিস্কাৰ নোহোৱা পৰ্যন্ত আমি সকলোৱে এই যুঁজ দৃঢ়তাৰে চলাই যাব লাগিব। আমি সকলোৱে যি কামেই নকৰো কিয় আমাৰ কৰ্মস্থলীত সামাজিক দূৰত্ব তথা নিজকে পৰিষ্কাৰ কৰি ৰাখি মুখত মাস্ক পৰিধান কৰিব লাগিব।
আনহাতে, কালি গুৱাহাটীত কেইবাগৰাকীও লোকৰ শৰীৰত কোভিড-১৯ ধৰা পৰিছে বুলি উল্লেখ কৰি মুখ্য মন্ত্ৰী সোণোৱালে গুৱাহাটীবাসীৰ লগতে অসমৰ ৰাইজে কোনো কাৰণতে ভয় খাব নালাগে বুলিও কয়।
আমি যদি সকলোৱে স্বাস্থ্য বিভাগে প্ৰদান কৰা নিৰ্দেশনা সম্পূৰ্ণৰূপে মানি চলো তেতিয়া হ’লে এই ৰোগ প্ৰতিহত কৰিব পাৰিম বুলিও সোণোৱালে মত প্ৰকাশ কৰে।
