ক’ৰ’না ভাইৰাছে সৃষ্টি কৰা এই দুৰ্যোগৰ সময়তো নিজৰ বিপদৰ কথা নাভাবি সেৱা আগবঢ়াই অহা ২২ গৰাকী সংবাদ কৰ্মীক দেওবাৰে হোজাইৰ সত্যনাৰায়ন সেৱা সমিতি (SSS) -এ সম্বৰ্ধনা জনায়।
হোজাইৰ দূৰ্গাবাৰী ৰাজহুৱা হ’লত অনুষ্ঠিত উক্ত সম্বৰ্ধনা সভাত সংবাদ কৰ্মীসকলক সামাজিক দূৰত্বৰ নিয়ম মানি ৰেইনকোট, হেণ্ড-চেনিটাইজাৰ আৰু মাস্ক বিতৰণ কৰা হয়।
দেশ বন্ধু বিদ্যাপীঠ উচ্চ মাধ্যমিক বিদ্যালয়ৰ প্ৰাক্তন অধ্যক্ষ প্ৰমোদ ৰঞ্জন দাস, SSSৰ সভাপতি অশোক ভদ্ৰ আৰু সম্পাদক ৰঞ্জিত সাহাই অনুষ্ঠানত সভাপতিত্ব কৰে।
সভাত প্ৰমোদ ৰঞ্জন দাসে কয়, ‘ক’ৰ’না ভাইৰাছৰ সংক্ৰমণক লৈ যি সময়ত সকলোৱে আতংকিত হৈ আছে সেই সময়ত কোভিড-১৯ৰ যোদ্ধাসকলে আগবঢ়োৱা সেৱা আদৰ্শস্বৰূপ’।
ৰাইজক কোভিড-১৯ সম্পৰ্কীয় সকলোধৰণৰ খবৰ দি অহাৰ বাবে দাসে সংবাদ মাধ্যমক প্ৰশংসা কৰে।
আনহাতে SSS এগৰাকী সদস্যই তেওঁলোকে প্ৰথমতে PPE kit দিয়াৰ কথা ভাবিছিল যদিও সেয়া পাবলৈ নথকাত ৰেইনকোট প্ৰদান কৰাৰ সিদ্ধান্ত লয় বুলি জনায়।
সম্বৰ্ধনা গ্ৰহণ কৰি তাত উপস্থিত সকলো সংবাদ কৰ্মীয়ে তেওঁলোকৰ প্ৰতি জনোৱা সন্মানৰ বাবে উদ্যোগতাসকলক ধন্যবাদ জ্ঞাপন কৰে।
