ক’ৰ’না ভাইৰাছৰ সমান্তৰালকৈ ৰাজ্যত গাহৰিৰ দেহত দেখা দিয়া আফ্ৰিকান ছোৱাইন ফিভাৰে গাহৰি পালক সকলৰ জীৱনলৈ অমানিশা নমাই আনিছে।
ইতিমধ্যে পশু পালন বিভাগে কেইবাখনো জিলাত হাজাৰ-হাজাৰ গাহৰিৰ মৃত্যু হোৱাত সতৰ্কতামূলক ব্যৱস্থা হিচাপে গাহৰিৰ কিনা-বেচা, গাহৰি মাংস বিক্ৰী বন্ধ কৰি দিছে।
গাহৰিৰ এই অস্বাভাৱিক মৃত্যু ৰোধ কৰিবৰ বাবে বিভাগৰ উপৰি বিভিন্ন স্থানত বেচৰকাৰী সংস্থা সমূহে গাহৰিৰ গড়ালকে ধৰি গাহৰিৰ বিচৰণ ঠাই সমূহত ছেনিটাইজেচনৰ ব্যৱস্থা কৰিছে।
যোৰহাট জিলাৰ টীয়কৰ জাঁজীমুখ অঞ্চল, বাঁহফলা অঞ্চলকে ধৰি কেইবাটাও অঞ্চলত মিচিং স্বায়ত্ব শাসিত পৰিষদৰ উদ্যোগত যোৰহাট জিলাৰ পশুপালন বিভাগৰ সহযোগত ছেনিটাইজেচনৰ ব্যৱস্থা কৰিছে।
যুৱ নেতা হৰেন ৰিচঙৰ বিশেষ তৎপৰতাত গ্ৰহণ কৰা এই কাৰ্যসূচীত পশু চিকিৎসক ডাঃ প্ৰবীন কুমাৰ নেওগকে ধৰি পশু পালন আৰু পশু চিকিৎসা বিভাগৰ কেইবাগৰাকী ক্ষেত্ৰ সহায়কে সহযোগিতা আগবঢ়ায়।
গাহৰি পালন যিহেতু মিচিং জনগোষ্ঠীৰ পৰম্পৰা, সেয়ে এই সংগঠনটোৱে তেওঁলোকৰ অধীনস্থ প্ৰায়বোৰ অঞ্চলতে গাঁৱৰ তথা এম এ চিৰ সদস্যৰ সহায়ত ঘৰে ঘৰে গৈ গাহৰি গড়ালসমূহ পৰিস্কাৰ কৰাৰ লগতে সজাগতা সৃষ্টি কৰিবলৈ চেষ্টা অব্যাহত ৰাখিছে।
