চুপাৰ চাইক্ল’ন আম্ফানৰ প্ৰভাৱ অসম, মেঘালয় আৰু অৰুণাচল প্ৰদেশত পৰৱৰ্তী ২৪ ঘণ্টাত পৰিলক্ষিত হ’ব।
এই সামুদ্ৰিক ধুমুহাই অসমকে ধৰি উত্তৰ-পূবৰ ৰাজ্যকেইখনত ঘণ্টাত ৫০ কি.মি.তকৈ অধিক বেগৰ বতাহ আৰু প্ৰচণ্ড বৰষুণ সৃষ্টি কৰাৰ সম্ভাৱনা আছে।
ভাৰতীয় বতৰবিজ্ঞান বিভাগে বৃহস্পতিবাৰে এই তথ্য সদৰী কৰিছে।
“অসম, মেঘালয় আৰু অৰুণাচল প্ৰদেশত ঘণ্টাত ৫০ কি.মি.তকৈ অধিক বেগৰ প্ৰচণ্ড বতাহ দেখা পোৱা যাব পাৰে…,” ভাৰতীয় বতৰ বিজ্ঞান বিভাগৰ সঞ্চালকপ্ৰধান মৃত্যুঞ্জয় মহাপাত্ৰই কয়।
বিশেষকৈ পশ্চিম অসম, মেঘালয়ৰ ঠাইবিশেষ আৰু অৰুণাচল প্ৰদেশত প্ৰচণ্ড বৰষুণ হোৱাৰ সম্ভাৱনা আছে।
সামুদ্ৰিক ধুমুহাজাকে ইতিমধ্যে পশ্চিম বংগত বিস্তৰ ক্ষতি কৰিছে। মুখ্য মন্ত্ৰী মমতা বেনাৰ্জীয়ে প্ৰকাশ কৰা মতে ধুমুহাত ৭২জন লোকৰ প্ৰাণ গৈছে।
কেবিনেট সচিব ৰাজীৱ গাউবাই বৃহস্পতিবাৰে এন চি এম চি (National Crisis Management Committee)ৰ এক বৈঠকত অধ্যক্ষতা কৰে আৰু পৰিস্থিতি পৰ্য্যালোচনা কৰে।
ভিডিঅ’ কনফাৰেন্সিঙৰ জৰিয়তে অনুষ্ঠিত বৈঠকখনত পশ্চিম বংগ আৰু ওড়িছাৰ মুখ্য সচিবৰ লগতে বিভিন্ন মন্ত্ৰ্যালয়ৰ জ্যেষ্ঠ বিষয়াসকলে ভাগ লয়।
পশ্চিম বংগ আৰু ওড়িছাত এন ডি আৰ এফ মোতায়েন কৰা হৈছে আৰু ৰাজ্য দুখনত ক্ৰমে পাঁচ লাখ আৰু দুই লাখ লোকক স্থানান্তৰ কৰা হৈছে।
পশ্চিম বংগলৈ এন ডি আৰ এফৰ অতিৰিক্ত বাহিনীও প্ৰেৰণ কৰা হৈছে।
শেহতীয়া খবৰ মতে প্ৰধান মন্ত্ৰী নৰেন্দ্ৰ মোদীয়ে ৰাজ্য দুখনৰ ধুমুহাত ক্ষতিগ্ৰস্ত অঞ্চলসমূহ পৰিদৰ্শন কৰিব।
