কৰ’না সংকটৰ মাজতে শুকুৰবাৰে ৰিজাৰ্ভ বেংক অফ ইণ্ডিয়াৰ (আৰ বি আই) গৱৰ্ণৰ শক্তিকান্ত দাসে ৰেপ’ ৰেট কৰ্তনৰ কথা ঘোষণা কৰিছে।
এই কৰ্তনৰ ফলত আৰ বি আইৰ ৰেপ’ ৰেট৪.৪০ শতাংশৰ পৰা ৪ শতাংশলৈ হ্ৰাস পালে।
তদুপৰি, ঋণৰ কিস্তি আদায় দিয়াৰ ক্ষেত্ৰতো গ্ৰাহকক তিনিমাহৰ অতিৰিক্ত সকাহ দিয়া হৈছে।
অৰ্থাৎ গ্ৰাহকে যদি আৰু তিনিমাহলৈ ঋণৰ কিস্তি নিদিয়ে তেতিয়াহ’ল বেংকে গ্ৰাহকৰ ওপৰত হেচা দিব নোৱাৰে।
আৰ বি আইৰ গৱৰ্ণৰে জানিবলৈ দিয়ে যে যোৱা তিনিদিন ধৰি এমপিচি (মুদ্ৰা ব্যৱস্থা সম্পৰ্কীয় সমিতি)য়ে ঘৰুৱা তথা বিশ্বৰ পৰিস্থিতিৰ সমীক্ষা চলায়।
ইয়াৰ পাছতে ৰেপ’ ৰেট ০.৪০ শতাংশ কৰ্তন কৰাৰ সিদ্ধান্ত লোৱা হয়।
লকডাউনৰ মাজতে দ্বিতীয়বাৰৰ বাবে আৰ বি আইয়ে ৰেপ’ ৰেট হ্ৰাস কৰিলে। পূৰ্বে যোৱা ২৭ মাৰ্চত আৰ বি আইৰ গৱৰ্ণৰে ০.৭৫শতাংশ ৰেপ’ ৰেট কৰ্তনৰ কথা ঘোষণা কৰিছিল।
ইয়াৰ পাছতে বেংকে ইয়াৰ ঋণত সুতৰ হাৰো কমাই দিছিল।ইয়াৰ ফলত গ্ৰাহকৰ কিস্তিৰ ধনৰ পৰিমানো স্বাভাৱিকতে হ্ৰাস পাইছে।
আৰ বি আইয়ে লকডাউনৰ আৰম্ভণিৰ দিনত সংবাদমেল পাতি বেংকৰ তিনিমাহৰ বাবে ঋণ আৰু কিস্তিত সকাহ দিয়াৰ কথা ঘোষণা কৰিছিল।
এতিয়া আৰ বি আইয়ে নতুনকৈ তিনিমাহৰ বাবে সময় দিয়াৰ কথা ঘোষণা কৰাৰ পাছত গ্ৰাহকে এতিয়া মুঠতে ছয় মাহৰ সকাহ লাভ কৰিব।
আনহাতে, এই সময়ছোৱাত গ্ৰাহকে বেংকৰ সন্মুখত ডিফ’ল্ট হ’বলগীয়া নহয়। অৱশ্যে, গ্ৰাহকে ইয়াৰ বাবে অতিৰিক্ত সুত ভৰিব লাগিব।
