ছিকিম বয়জ ক্লাবে আয়োজন কৰা দ্বিতীয় সংখ্যক মহেন্দ্ৰ কাৰ্কী সোঁৱৰণী আমন্ত্ৰনমূলক ফুটবল প্ৰতিযোগিতাখন অহা এপ্ৰিলৰ ১০-১৯ তাৰিখলৈ পালজৰ ষ্টেডিয়ামত অনুষ্ঠিত কৰা হ’ব বুলি ক্লাবটোৱে জানিবলৈ দিয়ে। প্ৰাক্তন ছিকিম ফুটবলাৰ মহেন্দ্ৰ কাৰ্কীৰ সোঁৱৰণত ক্লাবটোৱে যোৱাবছৰৰ পৰা এই প্ৰতিযোগিতাখন আৰম্ভ কৰিছিল।
ক্লাবটোৰ এখন প্ৰস্তুতিমূলক আলোচনাৰ অন্তত প্ৰতিযোগিতাখন এপ্ৰিল মাহত অনুষ্ঠিত কৰাৰ সিদ্ধান্ত গ্ৰহণ কৰে। দাৰ্জিলিং, কাৰচিয়ং, কালিমপং আৰু শিলিগুৰিৰ পৰা একোটাকৈ দল প্ৰতিযোগিতাখনৰ বাবে আমন্ত্ৰণ কৰিব বুলি আয়োজকে জানিবলৈ দিয়ে। লগতে ১৫ মাৰ্চৰ ভিতৰত অংশগ্ৰহণকাৰী দলৰ তালিকা সম্পূৰ্ণ হৈ উঠিব বুলিও প্ৰকাশ কৰে।
উল্লেখণীয় যে প্ৰতিযোগিতাখনৰ প্ৰথম সংস্কৰণ আৰম্ভ হৈছিল যোৱা বছৰৰ মে মাহত। আৰু চেম্পিয়ন দল হ’ল ছিকিম আক্ৰমণ ফুটবল ক্লাব। মুঠ ১০ টা দলে যোৱাবাৰৰ প্ৰতিযোগিতাখনত অংশগ্ৰহণ কৰিছিল।
মন কৰিবলগীয়া যে ছিকিম বয়জ ক্লাবটোৰ বহু সদস্যই ৰাষ্ট্ৰীয় তথা আঞ্চলিক প্ৰতিযোগিতাত মহেন্দ্ৰ কাৰ্কীৰ সৈতে একেলগে খেলত অংশগ্ৰহণ কৰিছিল। সেয়ে ক্লাবটোৱে মহেন্দ্ৰ কাৰ্কীক শ্ৰদ্ধাঞ্জলী দিয়াৰ উদ্দেশ্যে এই ফুটবল প্ৰতিযোগিতাখনৰ আয়োজন কৰিছে।
স্মৰ্তব্য যে গেংটক নিবাসী ফুটবলাৰ মহেন্দ্ৰ কাৰ্কী যোৱা ২০১১ চনত এটা কাৰ দুৰ্ঘটনাত নিহত হৈছিল। মৃত্যুৰ সময়ত তেওঁৰ বয়স আছিল ৩১ বছৰ। তেওঁ বহু স্থানীয় ক্লাবৰ হৈ খেলাৰ লগতে আঞ্চলিক আৰু ৰাষ্ট্ৰীয় পৰ্যায়ত নিজ ৰাজ্যক প্ৰতিনিধিত্ব কৰাৰো সুযোগ লাভ কৰিছিল।
বিপৰীত দলৰ বাবে মূৰৰ কামোৰণী ডিফেণ্ডাৰ কাৰ্কীয়ে ২০০৪ চনৰ নতুন দিল্লীত অনুষ্ঠিত সন্তোষ ট্ৰফীতো নিজ দলক প্ৰতিনিধিত্ব কৰি কোৱাৰ্টাৰ ফাইনেলত প্ৰৱেশ কৰিছিল।
