শাৰিৰীক বাধা গ্ৰস্ততা তথা দৰিদ্ৰতা কেতিয়াও সফলতাৰ হেঙাৰ হ’ব নোৱাৰে মেধা ছাত্ৰ-ছাত্ৰীসকলৰ বাবে। এই কথা পুনৰবাৰ প্ৰমাণ কৰি দিছে নগাঁও জিলাৰ পুৰণিগুদাম হাতীগাঁৱৰ এজন বিশেষভাৱে সক্ষম কিশোৰে।
সদ্য ঘোষিত হাইস্কুল শিক্ষান্ত পৰীক্ষাত সমাজ বিজ্ঞান বিষয়ত লেটাৰ মাৰ্কসহ প্ৰথম বিভাগত সুখ্যাতিৰে উৰ্ত্তীৰ্ণ হৈ বিদ্যালয়খনৰ লগতে অঞ্চলবাসীলৈও কঢ়িয়াই আনিছে গৌৰৱ।
পুৰণিগুদামৰ ৰাধাকান্ত বৰুৱা উচ্চতৰ মাধ্যমিক বিদ্যালয়ৰ পৰা হাইস্কুল শিক্ষান্ত পৰীক্ষাত অৱতীৰ্ণ হোৱা বিশেষভাৱে সক্ষম দিগন্ত কুমাৰ বৰা আৰু মাতৃসহ পিতৃ ৰতন বৰাৰ সৰু পৰিয়ালটোৱে বিদ্যালয়খনৰ সন্মুখতে এটি সৰু পজা ভাৰা লৈ কোনো মতে বাস কৰি আছিল।
এখন হুইল চেয়াৰকে সাৰথি কৰি জীৱন সংগ্ৰাম আৰু শিক্ষা সুচাৰুৰূপে অব্যাহত ৰখা ছাত্ৰ জনক মাতৃয়ে কেৱল নিতৌ বিদ্যালয়খনলৈ অনা-নিয়া কৰায়ে নহয় শিক্ষা আৰু আনুসাঙ্গিক ক্ষেত্ৰ সমূহতো পথ প্ৰদৰ্শক হিচাবে দ্বায়িত্ব পালন কৰি আহিছিল।
দিগন্তই ভৱিষ্যতে “চ’ফ্টৱেৰ ইঞ্জিনিয়াৰ” হোৱাৰ সপোন পুহি ৰাখিছে যদিও পৰিয়ালটোৰ আৰ্থিক দুৰৱস্থাৰ বাবে সপোন কৰবাত যেন মৰহী যোৱাৰ উপক্ৰম হৈছিল। কিন্তু এনি সময়তে বিশেষভাৱে সক্ষম দিগন্তৰ কাষত থিয় দিছে বৃহত্তৰ পুৰণিগুদাম অঞ্চলৰ কেইবাজনো হৃদয়বান লোক।
ইয়াৰে ভাস্কৰ জ্যোতি দাস নামৰ ডাকঘৰৰ এজন ঠিকাভিত্তিক অস্থায়ী কৰ্মীয়ে ছাত্ৰ জনৰ সফলতাত নথৈ আনন্দিত হৈ উচ্চতৰ মাধ্যমিকৰ প্ৰথম বৰ্ষৰ সকলো কিতাপ অথবা অধ্যয়নৰ বাবে প্ৰয়োজনীয় সামগ্ৰী সমূহ ছাত্ৰ জনক গাঠিৰ ধন ভাঙি নিজাববীয়াকৈ যোগান ধৰিব বুলি আশ্বাস প্ৰদান কৰিছে।
সমান্তৰালভাৱে ছাত্ৰজনৰ উজ্জ্বল ভৱিষ্যতৰ বাবে বৃহত্তৰ অঞ্চলটোৰ সমূহ শুভাকাংক্ষীকে ছাত্ৰজনৰ প্ৰতি সহায়ৰ হাত আগবঢ়াবৰ বাবে কাতৰ আহ্বান জনাই স্থানীয় যুৱক ভাস্কৰ জ্যোতি দাসে।
ইফালে অখিল ভাৰত বিদ্যাৰ্থী পৰিষদ, পুৰণিগুদাম শাখাৰ বিষয়াববীয়া সকল ছাত্ৰজনৰ বাসগৃহত উপস্থিত হৈ বিদ্যালয়খনৰ লগতে বৃহত্তৰ পুৰণিগুদাম অঞ্চললৈ সুনাম কঢ়িয়াই অনাৰ বাবে বিশেষভাৱে সম্বৰ্ধনা জ্ঞাপন কৰে বুলি জানিব পৰা গৈছে।
