কৰ্মচাৰী ভৱিষ্যনিধি সংস্থা অৰ্থাৎ এমপ্লয়িজ প্ৰভিডেন্ট ফাণ্ড অৰ্গেনাইজেশ্যন (ইপিএফঅ’)ই ইপিএফ একাউন্টৰ গৰাকীক অৱসৰৰ পাছত বিত্তীয় সকাহ আগবঢ়ায়।
কিন্তু বহুত কম লোকে জানে যে ইপিএফে লাইফ কভাৰেজো আগবঢ়ায়। চাকৰি কালত মৃত্যু হ’লে এটা ইপিএফ একাউন্টৰ গৰাকীলৈ ৬লাখ টকালৈকে জীৱন বীমাৰ এই ধন আগবঢ়ায়।
ইপিএফ একাউন্টৰ গৰাকীলৈ এই জীৱন বীমা EDLI 1976 নিয়মৰ অধীনত দিয়া হয়।
এই নিয়ম সন্দৰ্ভত SEBIৰ পঞ্জীকৃত বিনিয়োগ পৰামৰ্শদাতা মনিকৰন সিংহলে কয় যে ইপিএফঅ’ই প্ৰভিডেন্ট ফাণ্ডৰ একাউন্টৰ গৰাকীলৈ বিনামূলীয়া জীৱন বীমা আগবঢ়ায়। ইপিএফ বা পিএফ একাউন্ট খোলাৰ পাছতে EDLI 1976 নিয়মৰ অধীনত প্ৰতিজন ইপিএফৰ গ্ৰাহকৰ বিনামূলীয়াকৈ বীমা কৰোৱা হয়।
ইপিএফৰ গ্ৰাহকসকল তেওঁলোকৰ মাহিলী বেছিক দৰমহাৰ ২০গুণ অধিক বা ৬লাখ টকাৰ ভিতৰত যিটো ন্যুনতম হয় সেইটো জীৱন বীমাৰ বাবে যোগ্য হয়।
আনহাতে, দীৰ্ঘদিনীয় অসুস্থতা, দুৰ্ঘটনাজনিত মৃত্যু বা স্বাভাৱিক মৃত্যুৰ ক্ষেত্ৰত ইপিএফঅ’ৰ গ্ৰাহকৰ নমিনিয়ে বীমা দাবী কৰিব পাৰে।
EDLIৰ অধীনত দাবী কৰা নমিনিলৈ মাত্ৰ এবাৰ জীৱন বীমাৰ ধন আগবঢ়োৱা হয়।
EDLI 1976 নিয়মৰ অধীনত আগবঢ়োৱা জীৱন বীমাৰ যোগ্যতাৰ মাপকাঠি হিচাপে ইপিএফ একাউন্টৰ গৰাকীৰ গ্ৰুপ মেডিকেল ইনছ্যুৰেন্স থাকিব নালাগিব।
গতিকেই এই নিয়মে মালিকসকলে গ্ৰুপ ইনছ্যুৰেন্স প্ৰদান নকৰা প্ৰধানকৈ উদ্যোগ তথা কাৰখানাত কাম কৰা কৰ্মচাৰীসকলৰ বাবে বিশেষ সহায়ক হ’ব।
