কোভিড ১৯ ৰ বিশ্ব ত্ৰাসৰ সময়ত আটাইতকৈ বেছিকৈ ক্ষতিগ্ৰস্ত হৈছে ছাত্ৰ-ছাত্ৰী সকল৷ যাৰ বাবে ছাত্ৰ-ছাত্ৰী সকল ক্ৰমান্বয়ে যেন শিক্ষা জগতখনৰ পৰা আঁতৰি গৈছে৷
শ্ৰেণী কোঠাৰ প্ৰতি অনীহাহে প্ৰকাশ কৰিব ধৰিছে৷ কোভিড ১৯ ৰ ভয়াৱহ সংক্ৰমনৰ সময়ত বিদ্যালয় সমুহ কেতিয়া খুলিব তাৰ কোনো নিশ্চয়তা নাই৷
এনে সময়তে গোলাঘাট পশ্চিম শিক্ষাখণ্ডৰ বোকাখাতত থকা কাৰ্যালয়ৰ সহযোগত বোকাখাতৰ মহকুমাধিপতিয়ে আজিৰে পৰা বোকাখাত মহকুমাৰ সমুহ বিদ্যালয়ৰ বাবে আৰম্ভ কৰিছে শিক্ষা দিপ্তী নামৰ এক বিশেষ আঁচনি৷
এই আঁচনিৰ জৰিয়তে মহকুমাটোৰ বিদ্যালয়ৰ ছাত্ৰ-ছাত্ৰী সকল বিদ্যালয়লৈ আহিব নোৱাৰাৰ ফলত এতিয়াৰ পৰা শিক্ষকসকলহে ছাত্ৰ ছাত্ৰীসকলৰ বাসগৃহলৈ গৈ শিক্ষাৰ্থীসকলৰ মানসিকতাৰ বুজ লোৱাৰ লগতে সামাজিক দূৰত্ব বজাই ৰাখি নিজ বাসগৃহতে পাঠদানৰ ব্যৱস্থা কৰিব লাগিব৷
আজি বোকাখাতৰ টাউন হাইস্কুলত আয়োজিত এক বিশেষ অনুষ্ঠানত এই আঁচনিৰ শুভাৰম্ভ কৰা হয়৷
অনুষ্ঠানত শিক্ষা বিভাগৰ বিষয়ববীয়াৰ, বিদ্যালয়সমুহৰ প্ৰধান শিক্ষক আৰু বিশিষ্ট ব্যক্তিসকল উপস্থিত থাকে৷ অনুষ্ঠানতে মহকুমাধিপতি বিবেক শ্যামে আনুষ্ঠানিকভাৱে শিক্ষা দিপ্তী নামৰ এই আঁচনিখন উদ্বোধন কৰে৷
মহকুমাধিপতি গৰাকীয়ে প্ৰতিগৰাকী শিক্ষক-শিক্ষয়িত্ৰীকে আন্তৰিকতাৰে এই কাৰ্য্যসূচী সফল কৰি তুলিবলৈ আহ্বান জনায়।
ছাত্ৰ-ছাত্ৰীসকলক দেশৰ ভৱিষ্যত বুলি উল্লেখ কৰি মহকুমাধিপতি বিবেক শ্যামে বৰ্তমানৰ সময়ছোৱাত সু-পৰিকল্পিত তথা সৃজনশীল পদ্ধতিৰে ছাত্ৰ ছাত্ৰীসকলৰ বৌদ্ধিক তথা মানসিক বিকাশ সাধন কৰিব লাগিব বুলিও উল্লেখ কৰে।
আজিৰ অনুষ্ঠানত পশ্চিম গোলাঘাট শিক্ষা খণ্ডৰ খণ্ড প্ৰাথমিক শিক্ষা বিষয়া বৰ্মণ টেৰণ, জেষ্ঠ নাগৰিক তথা সাংবাদিক ভবানন্দ কলিতা, অসম ৰাজ্যিক সাংবাদিক সন্থাৰ সভাপতি জিতু শৰ্মা ৰাজখোৱা আৰু বিদ্যালয়সমূহৰ প্ৰধান শিক্ষক-শিক্ষয়িত্ৰীসকল উপস্থিত থাকে।
অনুষ্ঠানটোৰ আঁত ধৰে খণ্ড সমল ব্যক্তি প্ৰদীপ শৰ্মাই।
