দুবাৰকৈ ৰাজ্যৰ শাসন চলোৱা আঞ্চলিক দল অসম গণ পৰিষদৰ প্ৰতিষ্ঠাপক সভাপতি তথা প্ৰাক্তন মুখ্য মন্ত্ৰী প্ৰফুল্ল কুমাৰ মহন্তই মঙলবাৰে বাঘজানৰ ক্ষতিগ্ৰস্ত লোক সকলৰ খা-খবৰ লোৱাৰ লগতে দলৰ সাংগঠনিক ভেটিৰ বিষয়ে বুজ লয়।
প্ৰাক্তন মুখ্য মন্ত্ৰী মহন্তই পৰিদৰ্শন কৰাৰ লগতে আশ্ৰয় শিবিৰত থকা লোক সকলৰ লগত মত বিনিময় কৰাৰ লগতে ক্ষতিপূৰণৰ সম্পৰ্কত প্ৰধান মন্ত্ৰী নৰেন্দ্ৰ মোদীৰ লগত আলোচনা কৰিব বুলিও অৱগত কৰে।
ইয়াৰ উপৰি মহন্তই অইলৰ মুখ্য পৰিচালন সঞ্চালক তথা অধ্যক্ষৰ লগত বাঘজানত সংঘটিত অঘ্নিকাণ্ড আৰু ক্ষতিপূৰণ সম্পৰ্কে আলোচনা কৰে।
বাঘজানৰ পৰিস্থিতি বুজ লোৱাৰ পিছতে প্ৰাক্তন মুখ্য মন্ত্ৰী প্ৰফুল্ল কুমাৰ মহন্তই অগপৰ তিনিচুকীয়া জিলা সমিতিৰ কাৰ্যালয়ত উপস্থিত হৈ দলীয় কৰ্মী সকলৰ সহযোগিতা আৰু সাংগঠনিক ভেটি সন্দৰ্ভত আলোচনা কৰে। ইতিমধ্যে এই বিষয়টোৱে বিশেষ তাৎপৰ্য বহন কৰিছে।
দলীয় নেতা-কৰ্মীসকলক অগপ তথা আঞ্চলিক শক্তিক অধিক মজবুত কৰিবলৈ প্ৰাক্তন মুখ্য মন্ত্ৰী মহন্তই আহ্বান জনায়।
ইফালে জিলাখনৰ একাংশ কৰ্মীয়ে বৰ্তমানৰ অগপ দলৰ নেতৃত্বৰ বিৰুদ্ধে ক্ষোভ উজৰাৰ লগতে উজনিৰ ডিব্ৰুগড়,তিনিচুকীয়াত দলক শক্তিশালী কৰাৰ বাবে মহন্তৰ হাত অধিক মজবুত হৈ থকা বুলিও চৰ্চা চলিছে।
উল্লেখ্য যে, উজনি অসমত প্ৰফুল্ল কুমাৰ মহন্তই দলীয় নেতা-কৰ্মী, কৰ্মকৰ্তা লৈ বিভিন্ন কামত সদল বলে ঘূৰি ফুৰা বিষয়টোয়েই অগপৰ বৰ্তমানৰ নেতৃত্বক চিন্তিত কৰি তুলিব বুলি বহুতে অভিহিত কৰিছে।