অৰুণাচল প্ৰদেশত প্ৰস্তাৱিত ১১,২০০ মেগাৱাট ক্ষমতাসম্পন্ন উজনি চিয়াং বহুমুখী নদীবান্ধ প্ৰকল্প বাতিলৰ দাবীত গুৱাহাটীত প্ৰতিবাদ সাব্যস্ত কৰে শতাধিক নাগৰিকে। অৰুণাচলৰ নদীবান্ধবিৰোধী গণ আন্দোলনৰ প্ৰতি সংহতি জনাই শুকুৰবাৰে কটন বিশ্ববিদ্যালয়ৰ সন্মুখত এই প্ৰতিবাদী কাৰ্যসূচী ৰূপায়ণ কৰা হয়। প্ৰতিবাদকাৰীসকলে প্ৰকল্পটো তাৎক্ষণিকভাৱে বাতিল কৰাৰ লগতে স্থানীয় ৰাইজৰ গণতান্ত্ৰিক মতামতক সন্মান জনাবলৈ চৰকাৰৰ ওচৰত দাবী জনায়।
প্ৰতিবাদকাৰীসকলে অভিযোগ কৰে যে নদীবান্ধবিৰোধী আন্দোলন দমন কৰাৰ উদ্দেশ্যে অৰুণাচল প্ৰদেশত চৰকাৰে দমনমূলক নীতি গ্ৰহণ কৰিছে আৰু প্ৰতিবাদকাৰীৰ ওপৰত হিংসাত্মক কাৰ্যকলাপ চলাইছে। শেহতীয়া প্ৰতিবাদৰ পাছত অৰুণাচল প্ৰদেশ বেআইনী কাৰ্যকলাপ (প্ৰতিৰোধ) আইন (APUAPA)ৰ অধীনত গ্ৰেপ্তাৰ তথা আটক কৰা ৬০ গৰাকীৰো অধিক লোকক বিনাচৰ্তে আৰু শীঘ্ৰে মুক্তি দিয়াৰ দাবীও উত্থাপন কৰে প্ৰতিবাদকাৰীসকলে।
প্ৰতিবাদস্থলীত উপস্থিত লোকসকলে কয় যে উজনি চিয়াং বহুমুখী নদীবান্ধ প্ৰকল্প কাৰ্যকৰী হ’লে হাজাৰ হাজাৰ পৰিয়ালে নিজৰ পূৰ্বপুৰুষৰ ভূমি হেৰুৱাবলগীয়া হ’ব পাৰে। ইয়াৰ উপৰি সংবেদনশীল হিমালয় অঞ্চলৰ প্ৰাকৃতিক পৰিৱেশৰ অপূৰণীয় ক্ষতি হোৱাৰ লগতে নদীকেন্দ্ৰিক জীৱিকা আৰু স্থানীয় জনগোষ্ঠীসমূহৰ সংস্কৃতিও গভীৰ সংকটৰ সন্মুখীন হ’ব। সেয়েহে স্থানীয় ৰাইজৰ মতামত আৰু সন্মতি অবিহনে এনে বৃহৎ প্ৰকল্প জাপি দিয়াৰ প্ৰচেষ্টা কোনো কাৰণতে মানি লোৱা নহ’ব বুলি তেওঁলোকে স্পষ্ট কৰি দিয়ে।
একেদৰে উত্তৰ-পূৰ্বাঞ্চলৰ নদীসমূহৰ ওপৰত নিৰ্মাণৰ পৰিকল্পনা কৰা সকলো বৃহৎ নদীবান্ধৰ বিৰুদ্ধে অসম আৰু অৰুণাচল প্ৰদেশৰ ৰাইজে একেলগে যুটীয়া আন্দোলন গঢ়ি তোলাৰ সংকল্প গ্ৰহণ কৰে। থলুৱা জনগোষ্ঠীসমূহৰ অধিকাৰ, পৰিৱেশ আৰু জীৱন-জীৱিকাৰ স্বাৰ্থত দুয়োখন ৰাজ্যৰ ৰাইজক ঐক্যবদ্ধ হ’বলৈও আহ্বান জনায় প্ৰতিবাদকাৰীসকলে।
আজিৰ প্ৰতিবাদী কাৰ্যসূচীত বিশিষ্ট নাগৰিক পৰেশ মালাকাৰ, মাইনী মহন্ত, শংকৰ শইকীয়া, মনোৰম গগৈ, ভূমি অধিকাৰ যৌথ সংগ্ৰাম সমিতিৰ সুব্ৰত তালুকদাৰ, বিদিশা বৰ্মন, চন্দন বৰগোহাঞি, চিপিআই(এম)ৰ নিৰংকুশ নাথ, সংগীতা দাস, উৎপলা দাস, চিপিআই(এমএল) লিবাৰেচনৰ পংকজ কুমাৰ দাস, চিপিআইৰ জয়ন্ত গগৈ, পাটকাই সভ্যতা সুৰক্ষা সমন্বয় মঞ্চৰ দেৱাংগ গগৈ, নিখিল ভাৰত কৃষক মজদুৰ সভাৰ দেৱজিৎ চৌধুৰী, জাতীয় যুৱ বাহিনীৰ অংকুমান বৰদলৈ আৰু ধনজিৎ বৈশ্য, উকিয়াম নদীবান্ধবিৰোধী আন্দোলনৰ চবিন ৰাভা আৰু ছাত্ৰ নেতা সিদ্ধাৰ্থ হাজৰিকা, যুৱ সমাজকৰ্মী অঞ্জুমান ভৰদ্বাজকে ধৰি গুৱাহাটী বিশ্ববিদ্যালয় আৰু কটন বিশ্ববিদ্যালয়ৰ বহু ছাত্ৰ-ছাত্ৰীয়ে অংশগ্ৰহণ কৰে।
