অসম আৰক্ষীৰ হাতত গ্ৰেপ্তাৰ হোৱাৰ ভয়ত পেঁপুৱা লাগিছে পশ্চিম বংগৰ বিতৰ্কিত তথা তথাকথিত বুদ্ধিজীৱি গৰ্গ চেতাৰ্জী।
টুইটাৰত বৰ অসমৰ ভেটি গঢ়োতা চাওলুং চ্যুকাফাক চীনা আক্ৰমণকাৰী আখ্যা দি এতিয়া আকৌ অসমৰ বাঙালী আৰু অসমীয়াৰ মাজত থকা সাতামপুৰুষীয়া বান্ধোন ভাঙিবলৈ উঠি-পৰি লাগিছে গৰ্গ চেতাৰ্জী।
অলপ আগতে দিয়া এটা ফে’চবুক প’ষ্টত তেওঁ কয়, ‘বাঙালীৰ পক্ষে কথা কোৱাৰ বাবে বাঙালীৰ শত্ৰু অসমৰ বিজেপি চৰকাৰে মোক গ্ৰেপ্তাৰ কৰিব বিচাৰিছে।‘
ইয়াৰ পূৰ্বে আহোম সম্প্ৰদায় আৰু অসম চৰকাৰক আক্ৰমণৰ লক্ষ্য কৰি দিয়া এটা টুইটত তেওঁ কৈছিল, ‘ভাৰতত এখন ৰাজ্য আছে য’ত অসম বিজেপিয়ে ‘ৰাজ্য দিৱস’ৰ দিনটোত চীনা আক্ৰমণকাৰীক শ্ৰদ্ধা জনায়। যিজনে ভাৰতক চীনা সৈন্য লগত লৈ অতি নৃশংসভাৱে আক্ৰমণ কৰিছিল। এইজন আক্ৰমণকাৰীক নায়ক সজাই ভাৰত বিৰোধী সশস্ত্ৰ সংগঠন আলফাই।’
মুখ্য মন্ত্ৰী সোণোৱালক উদ্দেশ্যি দিয়া দ্বিতীয় টুইটত কয়, ‘কি কাৰণত সৰ্বানন্দ সোণোৱালে নিয়মীয়াকৈ চীনা আক্ৰমণকাৰী আৰু তেওঁৰ সৈন্যবাহিনীৰ জন্মদিৱস উদযাপন কৰে? ঠিক সেইদৰে কিয় নিষিদ্ধ ঘোষিত সংগঠন আলফাই চীনা আক্ৰমণকাৰীসকলৰ দিৱস উদযাপন কৰে? কিয় বিজেপি চৰকাৰে ভাৰত চৰকাৰৰ ধন চীনা আক্ৰমণকাৰীৰ মূৰ্তি নিৰ্মাণ কৰাৰ নামত খৰচ কৰে?’’
এই দুটা টুইট দৃষ্টিগোচৰ হোৱাৰ পাছতে আজি মুখ্য মন্ত্ৰী সৰ্বানন্দ সোণোৱালে মহানগৰ আৰক্ষী আয়ুক্ত মুন্না প্ৰসাদ গুপ্তাক কলকাতাৰ পৰা গৰ্গ চেটাৰ্জীক গ্ৰেপ্তাৰ কৰি অসমলৈ আনিবলৈ নিৰ্দেশ দিছিল।
কিন্তু অসমীয়াক শত্ৰুজ্ঞান কৰি প্ৰকাৰন্তে সমালোচনাৰ লক্ষ্য কৰি অহা গৰ্গই এইবাৰ ইয়াক সাম্প্ৰদায়িক ৰূপ দিবলৈ উঠি-পৰি লাগিল।
গ্ৰেপ্তাৰৰ নিৰ্দেশৰ পিছতে ফেইচবুকত দিয়া পোষ্টত অসমৰ বিজেপি চৰকাৰক বাঙালীৰ শত্ৰু আখ্যা দিয়াৰ উপৰিও গৰ্গৰ কাষত থিয় হ’বলৈ ভাৰতৰ সকলো বাঙালী লোকক আহ্বান জনায়।
যি কথাই জাতি-ধৰ্ম-বৰ্ণ নিৰ্বিশেষে থকা একতাৰ এনাজৰীডাল কিছু পৰিমাণে হ’লেও ঢিলা হৈ পৰিব।
তেওঁৰ এই মন্তব্যৰ পাছত ৰাজ্যৰ বিজেপি চৰকাৰখনে কেনে ব্যৱস্থা গ্ৰহণ কৰে সেয়া লক্ষণীয় হ’ব।
