মহানগৰ গুৱাহাটীত ক’ৰ’নাৰ ভয়ংকৰ গণ সংক্ৰমণ হোৱা আৰম্ভ কৰিছে। যোৱা ১৫ জুনৰ পৰা ৭৬২ গৰাকী লোক কামৰূপ মেট্ৰ’ত আক্ৰান্ত হোৱাৰ বিপৰীতে কেৱল গুৱাহাটীতে ৬৭৬ গৰাকী লোক ক’ৰ’নাত আক্ৰান্ত হৈছে।
যাৰ ফলত ভয়ংকৰ গণ সংক্ৰমণৰ দিশে অগ্ৰসৰ হৈছে মহানগৰ গুৱাহাটী। কিন্তু এই কথা অনুধাৱন নকৰি গুৱাহাটীবাসীয়ে মুখত মাস্ক পৰিধান নকৰি বা সামাজিক দূৰত্ব বৰ্তাই বজাৰ সমাৰ নকৰাত ক্ষোভিত হৈ পৰিছে মন্ত্ৰী ড০ হিমন্ত বিশ্ব শৰ্মা। যেন ক’ৰ’নালৈ কেৰেপেই নকৰে গুৱাহাটীবাসীয়ে।
এই প্ৰসংগ উত্থাপন কৰি আজি ৰাষ্ট্ৰীয় স্বাস্থ্য অভিযানৰ কাৰ্যালয়ত সম্বোধন কৰা এক সংবাদমেলত ভাৰতৰ অন্য মহানগৰৰ পৰিবেশৰ অৱস্থাৰ উদাহৰণ দিয়ে।
সংবাদমেলত মন্ত্ৰীগৰাকীয়ে কয় ‘পৰহি দিনা দিল্লীত আছিলো, তেতিয়া দেখা পাইছিলো যে সকলো মানুহে মাস্ক ব্যৱহাৰ কৰি চলা-ফুৰা কৰি আছিল। তাত ৰাস্তা-ঘাটলৈ প্ৰয়োজন নহ’লে মানুহ ওলাই নাহে।‘
‘আমি মোবাইলত কাৰোবালৈ ফোন কৰিলেই মাস্ক ব্যৱহাৰ কৰিব, ২ মিটাৰ ব্যৱধান মানি চলিব বুলি শুনিবলৈ পাওঁ। কিন্তু তাৰ পাছতো কাৰ্যতঃ গুৱাহাটী মহানগৰীৰ ১০ শতাংশ লোকেও মাস্ক ব্যৱহাৰ কৰা নাই আৰু সামাজিক ব্যৱধান মানি চলা নাই।‘ ক্ষোভ প্ৰকাশ কৰি মন্ত্ৰী হিমন্তই এইদৰে কয়।
ইপিনে, গুৱাহাটীত যি পৰিবেশ চলি আছে সেয়া ভাৰতৰ কোনো মহানগৰীতে চলি থকা নাই বুলি দাবী কৰি মন্ত্ৰীয়ে কয় ‘বাংগালুৰু, মুম্বাই আৰু দিল্লী ইত্যাদি কোনো চিটীতে এই অৱস্থা হোৱা নাই। মহানগৰীৰ জিএছ ৰোডতো খুল্লম খুল্লা মাস্ক নিপিন্ধাকৈ খোজ কাঢ়ি আছে। আনকি ইজনে আনজনক নকয় মাস্কখন পিন্ধি লওঁক বুলি।‘
‘বহুতক মাস্ক কিয় পিন্ধা নাই বুলি মই সুধিলে মোকে ওলোটাই কয় ছাৰ আপুনি আছে নহয় সেইকাৰণে মাস্ক পিন্ধা নাই।‘হিমন্তই এইদৰে কয়।
ইয়াৰোপৰি মহানগৰীলৈ সন্ধিয়াৰ আড্ডাৰ পৰিবেশ ঘূৰি অহা বুলি উল্লেখ কৰি লগতে কয়, ‘পূৰ্বৰ যি মহানগৰীৰ স্বৰূপ ১০ গৰাকী লোকে একেলগে বহি আড্ডা মাৰে বা হোটেলত বহি থকাৰ পৰম্পৰা সেয়া মহানগৰীলৈ পুনৰ লাহে লাহে উভটি আহিছে।এইবিলাকে মহানগৰীৰ পৰিবেশ অত্যন্ত ভয়াবহ কৰি তুলিলে।‘
তেওঁ আৰু কয়, ‘ৰাইজে এটা কথা অনুভৱ কৰিব লাগিব মহানগৰীত হস্পিতালসমূহত মুঠ ৮৯০ খন বিচনা আছে। আৰু গড়ে ২০০ ৰ অধিক কেচ পালে চাৰিদিনত হস্পিতাল বেড পৰিপূৰ্ণ হৈ যাব।‘ এইদৰে কয় হিমন্তই।
ইপিনে, ল’কডাউনৰ ফলত আৰ্থিক সংকটে দেখা দিলেও সৰহসংখ্যক ব্যৱসায়ীয়েও নিজৰ সামাজিক দায়িত্ব পালনত ব্যৰ্থ হৈছে বুলি সদৰী কৰি মন্ত্ৰীগৰাকীয়ে লগতে কয় ‘প্ৰতিষ্ঠানৰ সন্মুখত চেনিটাইজাৰ নাৰাখে।‘
মন্ত্ৰীগৰাকীৰ মতে, ‘এনে ৰূপত গুৱাহাটীত ক’ৰ’না আক্ৰান্তৰ সংখ্যা বৃদ্ধি পাই গৈ থাকিলে নগাঁও, তেজপুৰ বা তাতকৈ দূৰ-দুৰণিলৈ ৰোগীসকলক চিকিৎসাৰ বাবে নিব লাগিব। তেতিয়া মানুহৰ মত প্ৰশ্ন আহিব গুৱাহাটীৰ পৰা কোভিড১৯ ৰোগীসকলক কিয় লৈ আহিছে?’
যদি জনসাধাৰণে কোভিডৰ ভয়াৱহতাৰ কথা পাহৰি যায় তেন্তে চৰকাৰে ইয়াৰ ব্যৱস্থা ল’বই লাগিব বা দায়িত্ব পালন কৰিব লাগিব বুলি হিমন্তই মত পোষণ কৰে।
‘কিয়নো ৮০০ ৰ ওপৰত ৰোগীৰ সংখ্যা বাঢ়ি যোৱাৰ লগে লগে ঘৰৰ পৰা ৰোগীসকলক আনিব নোৱাৰা হ’ম। তেতিয়া সেই সংক্ৰমণে ভয়াৱহ ৰূপ ধাৰণ কৰিব তথা মৃতকৰ সংখ্যা বৃদ্ধি পাব আৰু সমস্যা অধিক জটিল হৈ পৰিব।‘ জনসাধাৰণলৈ সতৰ্কবাণী শুনাই হিমন্তই কয়।
এইবোৰ সমস্যাৰ পৰিপ্ৰেক্ষিততে অত্যন্ত অনিচ্ছাস্বত্তেও চৰকাৰে ল’কডাউন দিয়াৰ সিদ্ধান্ত গ্ৰহণ কৰিবলগীয়া হ’ল বুলি তেওঁ সংবাদমেলত সদৰী কৰে।
