তৃতীয় লিংগৰ ব্যক্তিসকলক কেন্দ্ৰীয় অৰ্ধসামৰিক বাহিনীসমূহত কম্বেট অফিচাৰ হিচাপে লোৱা হ’ব পাৰে।
কেন্দ্ৰই ইউ পি এছ চি চি এ পি এফ (UPSC CAPF) পৰীক্ষাত অৱতীৰ্ণ হ’বলৈ তেওঁলোকক অনুমতি দিয়াৰ কথা বিবেচনা কৰি আছে।
বাতৰি মতে, এই সন্দৰ্ভত কেন্দ্ৰীয় গৃ্হ মন্ত্ৰ্যালয়ে চি আৰ পি এফ, চি আই এছ এফ, আই টি বি পি আৰু এছ এছ বিকে ধৰি অৰ্ধসামৰিক বাহিনীৰ বিভিন্ন শাখাসমূহৰ পৰা মতামত বিচাৰিছে।
চি এ পি এফ (এছিষ্টেণ্ট কমাণ্ডেণ্ট) পৰীক্ষা ২০২০ৰ বিধিত পুৰুষ/ মহিলাৰ লগতে তৃতীয় লিংগকো অন্তৰ্ভুক্ত কৰা বিষয়টো পৰীক্ষা কৰিবলৈ মন্ত্ৰ্যালয়ে কৰ্তৃপক্ষসমূহক নিৰ্দেশ দিছে।
বাতৰি মতে, যোৱা ডিচেম্বৰত কেন্দ্ৰই ট্ৰান্সজেণ্ডাৰ পাৰ্ছনছ (প্ৰটেক্সন অৱ ৰাইটছ) এক্ত সূচিত কৰাৰ পিছত তেওঁলোকক এতিয়া সমসুযোগ দিয়াতো প্ৰয়োজনীয়।
তৃতীয় লিংগৰ ব্যক্তিক এছিষ্টেণ্ট কমাণ্ডেণ্টৰূপে জৰিত কৰোৱা সন্দৰ্ভত মন্ত্ৰ্যালয়ে অৰ্ধসামৰিক বাহিনীসমূহৰ পৰা নিৰ্দিষ্ট সময়ৰ ভিতৰত মতামত বিচাৰিছে।
এছিষ্টেণ্ট কমাণ্ডেণ্ট পদবীটো পাঁচটা বাহিনীৰ প্ৰৱেশ স্তৰৰ বিষয়াৰ ৰেংক।
