ভাৰতক ৰঙা চকু দেওৱাই চীনে এইবাৰ নিজেই সংকটত পৰিব নেকি?
এই প্ৰশ্নই এতিয়া আন্তজাৰ্তিক মহলত ব্যাপক চৰ্চাৰ আৰম্ভ হৈছে।
লাডাখৰ ভাৰত-চীন সীমান্তত ভাৰতৰ সৈতে বিবাদ লিপ্ত হৈ থকাৰ সমান্তৰালভাৱে চীনে সৈন্য সঞ্চালনো বঢ়াই আনিছে।
এক প্ৰকাৰে ভাৰতক ৰঙা চকু দেখুওৱাই আহিছে চীনে।
তেনে সময়তে চীনে দখল কৰি ৰখা বিতৰ্কিত দক্ষিণ চীন সাগৰলৈ মাৰ্কিন যুক্তৰাষ্ট্ৰই প্ৰেৰণ কৰিছে যুদ্ধবিমান কঢ়িয়াই নিয়া দুখনকৈ যুদ্ধ জাহাজ।
উল্লেখ্য যে দক্ষিণ চীন সাগৰৰ দখলদাৰীত্বকলৈ চীন আৰু উপকূলীয় দেশসমূহৰ লগতে আমেৰিকাৰ সৈতে দীৰ্ঘ দিন ধৰি বিবাদ চলি আহিছে।
যোৱা ৫ জুনত চীনে ঘোষণা কৰিছিল যে, দক্ষিণ চীন সাগৰৰ পাৰচেল দীপপুঞ্জৰ সমীপতে সামৰিক অনুশীলন চলাব।
ইফালে এই দ্বীপটোকলৈ চীন আৰু ভিয়েটনামৰ সৈতে দীৰ্ঘদিন ধৰি বিবাদ চলি আহিছে।
চীনৰ সামৰিক অনুশীলন চলি থকাৰ মাজতে মাৰ্কিন যুক্তৰাষ্ট্ৰই যুদ্ধবিমানবাহী জাহাজ প্ৰেৰণ কৰাত সমগ্ৰ অঞ্চলটোত উত্তেজনাই বিৰাজ কৰিছে।
ইফালে হংকঙত চীনৰ আগ্ৰাসন আৰু দক্ষিণ চীন সাগৰৰ অঞ্চলৰ শুল্ককলৈ আমেৰিকা আৰু চীনৰ মাজত কূটনৈতিক সম্পৰ্ক অতি তিক্ত হৈ পৰিছে।
এনে এক পৰিস্থিতিত দক্ষিণ চীন সাগৰলৈ আমেৰিকাৰ দুই বৃহৎ যুদ্ধ জাহাজ প্ৰেৰণে দুই দেশৰ মাজৰ দ্বন্দ্বক অধিক তিক্ততৰ কৰিব তুলিব বুলি ধাৰণা কৰা হৈছে।
“ইন্দো-পেছিফিক অঞ্চলক স্বাধীন আৰু মুক্ত কৰাৰ স্বাৰ্থতেই এই পদক্ষেপ গ্ৰহণ কৰা হৈছে। আমাৰ বন্ধু শক্তিলৈ দ্ব্যৰ্থহীন ভাষাত আমি এই বাৰ্তা প্ৰেৰণ কৰিছো।” চীনৰ নাম উল্লেখ নকৰাকৈ সংবাদ এজেঞ্চি ৰয়টাৰক এইদৰে কয় ইউ এছ ৰোনাল্ড ষ্ট্ৰাইক গ্ৰুপৰ কামাণ্ডাৰ জৰ্জ এম উইকৱফে।
ইফালে দক্ষিণ চীন সাগৰীয় অঞ্চলত সামৰিক উত্তেজনা বৃদ্ধিৰ বাবে আমেৰিকাক জগৰীয়া কৰিছে চীনে।
ভিয়েটনাম, কম্বোডিয়া, টাইৱান, ফিলিপাইনছ আদি দেশে বিশ্ব বাণিজ্যৰ কেন্দ্ৰ দক্ষিণ চীন সাগৰক চীনৰ প্ৰভাৱক বিৰোধ কৰি আহিছে।
আনকিএই সন্দৰ্ভত উপকূলীয় দেশকেইখনে চীন বিৰুদ্ধে সমূহীয়াভাৱে বিবৃতিও প্ৰদান কৰিছে।
মাৰ্কিন যুদ্ধবিবানবাহী দুখনকৈ বিশাল জাহাজে দক্ষিণ চীন সাগৰত প্ৰৱেশ কৰাৰ পিছত চীনে কি পদক্ষেপ গ্ৰহণ কৰে তাৰ ওপৰতে নিৰ্ভৰ কৰিব দক্ষিণ চীন সাগৰৰ ভৱিষ্যৎ।
