আমেৰিকাৰ পাছত ব্ৰিটেইনতো উজুটি খোৱাৰ পথত আগবাঢ়িছে চীন। দেশখনত 5G নেটৱৰ্ক সেৱা আপগ্ৰেডেশ্যনৰ দায়িত্ব লাভ কৰা চীনৰ সংস্থা Huawei ৰ চুক্তি বাতিল হোৱাৰ পথত।
ৰাষ্ট্ৰীয় নিৰাপত্তাৰ কথা মনত ৰাখি ব্ৰিটেইনৰ প্ৰধান মন্ত্ৰী বৰিছ জনছনে এই অনুমতি বাতিল কৰাৰ কথা চিন্তা কৰিছে।
দেশখনত চলিত বছৰতে Huawei ৰ প্ৰযুক্তি পৰ্যায়ক্ৰমে বন্ধ কৰি দিয়াৰ সিদ্ধান্ত লোৱা হৈছে।
স্বাভাৱিকতে এই সিদ্ধান্তৰ ফলত চীন আৰ্থিকভাৱে ভীষণ ক্ষতিগ্ৰস্ত হ’ব।
ইপিনে. কৰ’না ভাইৰাছৰ সংক্ৰমণক লৈ চীনৰ ওপৰত ক্ষুব্ধ হৈ পৰা আমেৰিকাই ৰাষ্ট্ৰীয় নিৰাপত্তাৰ খাতিৰত চীনৰ দুটাকৈ সংস্থাক বিনিয়োগকাৰী তথা যোগানকাৰীৰ তালিকাৰ পৰা বাদ দিছে।
ইয়াৰ ভিতৰত এটা হৈছে Huawei। এতিয়া ব্ৰিটেইনেও কোম্পানীটোৰ পৰা চুক্তি কাঢ়ি ল’লে ইয়াৰ বাবে ডাঙৰ আঘাত হ’ব।
ব্ৰিটিছ সংবাদ মাধ্যমৰ বাতৰি অনুসৰি, ব্ৰিটেইন চৰকাৰে চীনৰ কোম্পানীৰটোৰ পৰা আহিব পৰা সম্ভাৱ্য ৰাষ্ট্ৰীয় নিৰাপত্তা তথা দেশৰ জনসাধাৰণৰ কি বিপদ হ’ব পাৰে তাৰ সমীক্ষা কৰিছে।
দেশখনৰ চোৰাংচোৱা সংস্থাই চীনৰ প্ৰযুক্তিৰ পৰা আহিব পৰা বিপদ সম্পৰ্কে ইতিমধ্যে সতৰ্ক কৰি দিছে।
দেশখনৰ নেশ্যনেল চাইবাৰ ছিকিউৰিটি চেন্টাৰৰ প্ৰতিবেদনত কোৱা হৈছে যে আমেৰিকাৰ নিষেধাজ্ঞাৰ ব্যাপক প্ৰভাৱ পৰাৰ পাছত চীনৰ কোম্পানীটোৱে নিম্নমানৰ প্ৰযুক্তি ব্যৱহাৰ কৰিব পাৰে।
ব্ৰিটেইনৰ প্ৰধান মন্ত্ৰী বৰিছ জনছনে দেশখনত Huawei ৰ কাম বন্ধ কৰি দিয়াৰ কথা চিন্তা কৰিছে বুলি দেশখনৰ সংবাদ মাধ্যমে প্ৰকাশ কৰিছে।
উল্লেখ্য যে ভাৰতেও চীনক আৰ্থিকভাৱে আঘাত সনাৰ বাবে কেইবাটাও ব্যৱস্থা গ্ৰহণ কৰিছে। চীনৰ ৫৯টা এপ বন্ধ কৰাৰ উপৰি বিএছএনএলে Huawei ৰ পৰা 4Gনেটৱৰ্ক আপগ্ৰেডেশ্যনৰ দায়িত্ব প্ৰত্যাহাৰ কৰিছে।
তদুপৰি, ভাৰতত ৰে’লপথ প্ৰকল্পত চীনৰ কোম্পানীক কাম নিদিয়াৰো সিদ্ধান্ত গ্ৰহণ কৰিছে।
