ক’ভিড-১৯ত যোৰহাট জিলাত প্ৰথমটো মৃত্যুৰ ঘটনা দেওবাৰে সংঘটিত হৈছে।
আশিস চাহেৱালা নামৰ এজন ৩৮ বছৰীয়া ব্যৱসায়ীয়ে ক’ভিড-১৯ত যোৰহাট চিকিৎসা মহাবিদ্যালয় আৰু হস্পিটেলত প্ৰাণ হেৰুৱাইছে।
যোৰহাটৰ বৰুৱানী বাটৰ দুৰ্গা ক্লথ ষ্ট’ৰ নামৰ দোকানখনৰ মালিক চাহেৱালা দেওবাৰে পুৱা চিকিৎসালয়ত ভৰ্তি হৈছিল আৰু আবেলি প্ৰায় ৩.৩০ বজাত তেওঁৰ মৃত্যু হয়।
মৃত্যুৰ পিছত অহা তেওঁৰ ক’ভিড টেষ্টৰ ফলাফলত তেওঁক পজিটিভ পোৱা গৈছে।
চাহেৱালাই যোৱা কিছুদিন ধৰি জ্বৰত ভুগি আছিল আৰু উশাহ লোৱাত অসুবিধা পোৱাৰ বাবে শনিবাৰে জে এম চি এইচত টেষ্ট কৰোৱাইছিল।
উশাহ লোৱাত অধিক কষ্ট পোৱা বাবে দেওবাৰে তেওঁ চিকিৎসালয়ত ভৰ্তি হৈছিল।
চিকিৎসালয়খনৰ এগৰাকী চিকিৎসকে জনোৱা মতে তেওঁৰ আন কিবা ৰোগ আছিল নেকি সেয়া নিশ্চিত কৰিব পৰা হোৱা নাই।
চিকিৎসকজনে লগতে জনাই যে টেষ্ট কৰিবলৈ আহোতেই শনিবাৰে তেওঁক চিকিৎসালয়ত ভৰ্তি হ’বলৈ কোৱা হৈছিল, কিন্তু তেওঁ মান্তি নহৈ ঘৰলৈ উভটি যায়।
যোৰহাটৰ উপায়ুক্ত ৰশ্নি এ কৰাতিয়ে জনোৱা মতে চাহেৱালাৰ আন কোনো সংক্ৰমিত ব্যক্তিৰ সৈতে সংস্পৰ্শ নাছিল।
চাহেৱালাই তেওঁৰ পত্নী, দুটা সন্তান, মাক আৰু ককায়েকক এৰি থৈ গৈছে।
যোৰহাটত এতিয়ালৈকে ১১ হাজাৰ ব্যক্তিৰ ক’ভিড টেষ্ট কৰোৱা হৈছে। তাৰে বৰ্তমান সক্ৰিয় ৰোগীৰ সংখ্যা ১২৫গৰাকী।
