যিটো সময়ত ভাৰতৰ প্ৰতি চীন, পাকিস্তান আদি দেশ সমূহৰ পৰা অহৰহ ভাবুকি আহি আছে সেই সময়তে বুধবাৰে ইউৰোপীয় সংঘৰ সৈতে ভাৰতে অসামৰিক পাৰমাণৱিক চুক্তি স্বাক্ষৰৰ বিষয়ত সহমত ব্যক্ত কৰে।
ভাৰত চৰকাৰৰ এগৰাকী মুখপাত্ৰই এই প্ৰসংগত মন্তব্য কৰি কয় যে ইউৰোপীয় সংঘৰ সৈতে ভাৰতে সুদীৰ্ঘ ১৩ বছৰ ধৰি অসামৰিক পাৰমাণৱিক চুক্তি স্বাক্ষৰৰ বিষয়ক লৈ আলোচনা চলাই গৈছিল।
অৱশেষত ভাৰতে সেই চুক্তিত স্বাক্ষৰ কৰাৰ সিদ্ধান্ত লয়।
অলপতে অনলাইন যোগে অনুষ্ঠিত হবলগীয়া ভাৰত-ইউৰোপীয় সংঘ শীৰ্ষ সন্মিলনত ভাৰতৰ প্ৰধান মন্ত্ৰী নৰেন্দ্ৰ মোডীয়ে অংশ গ্ৰহণ কৰিব।
উক্ত সন্মিলনত ইউৰোপীয় কাউন্সিলৰ মুৰব্বী চাৰ্লছ মিছেল আৰু ইউৰোপীয় কমিছনৰ মুৰব্বী উৰছুলা ভন ডাৰ লিয়েনে অংশগ্ৰহণ কৰিব।
সন্মিলনৰ সময়তে অসামৰিক পাৰমাণৱিক চুক্তি খনৰ ৰুপ ৰেখা প্ৰস্তুত কৰা হব বুলি মুখপাত্ৰ গৰাকীয়ে প্ৰকাশ কৰে।
চুক্তিখন স্বাক্ষৰ হ’লে পাৰমাণৱিক ইন্ধনৰ ক্ষেত্ৰত ভাৰতে ইউৰোপীয় সংঘৰ অন্তৰ্গত দেশ সমূহৰ পৰা সহায় লাভ কৰিব।
ইউৰোপীয় সংঘৰ ২৭ খন দেশলৈ ভাৰতে ২০১৮-১৯ বৰ্ষত ৫৭ বিলিয়ন মাৰ্কিন ডলাৰৰ সামগ্ৰী ৰপ্তানি কৰিছে।
