দেশত অব্যাহত থকা মহামাৰী ক’ৰ’নাতংকৰ বাবে শ্ৰীমন্ত শংকৰ একাডেমী চ’ছাইটিয়ে ইয়াৰ অধীনত থকা পাঁচখন শিক্ষানুষ্ঠানৰ টিউশ্যন মাচুল হ্ৰাস কৰিছে।
উল্লেখ্য যে, ১৯৯১ চনত স্থাপিত শ্ৰীমন্ত শংকৰ একাডেমী চ’ছাইটিৰ অসমত ৫ খন প্ৰতিষ্ঠিত শিক্ষানুষ্ঠান আছে।
চ’ছাইটিৰ শিক্ষানুষ্ঠানসমূহ হৈছে ক্ৰমে, শ্ৰীমন্ত শংকৰ একাডেমি, পাণবজাৰ, শ্ৰীমন্ত শংকৰ একাডেমি চিনিয়ৰ হায়াৰ ছেকেণ্ডাৰী স্কুল, দিছপুৰ, গিৰিজানন্দ চৌধুৰী ইনষ্টিটিউট অৱ মেনেজমেন্ট এণ্ড টেকন’ল’জি( GIMT), গুৱাহাটী, গিৰিজানন্দ চৌধুৰী ইনষ্টিটিউট অৱ মেনেজমেন্ট এণ্ড টেকন’ল’জি( GIMT) তেজপুৰ আৰু গিৰিজানন্দ চৌধুৰী ইনষ্টিটিউট ফাৰ্মাচিকেল ছাইন্স(GIPS), গুৱাহাটী।
শ্ৰীমন্ত শংকৰ একাডেমী চ’ছাইটিৰ সম্পাদক বিজয়ানন্দ চৌধুৰীয়ে নৰ্থইষ্ট নাওক জনোৱা অনুসৰি ৰাজ্যত মহামাৰী কোভিড১৯এ সংহাৰৰ পৰিপ্ৰেক্ষিতত শ্ৰীমন্ত শংকৰ একাডেমী চ’ছাইটিয়ে ইয়াৰ পাঁচখন শিক্ষানুষ্ঠানৰ শিক্ষাৰ্থীসকলৰ মাহিলি টিউশ্যন মাচুল হ্ৰাস কৰাৰ সিদ্ধান্ত গ্ৰহণ কৰিছে।
“গিৰিজানন্দ চৌধুৰী ইনষ্টিটিউট অৱ মেনেজমেন্ট এণ্ড টেকন’ল’জি( GIMT), গুৱাহাটী, গিৰিজানন্দ চৌধুৰী ইনষ্টিটিউট অৱ মেনেজমেন্ট এণ্ড টেকন’ল’জি( GIMT) তেজপুৰ আৰু গিৰিজানন্দ চৌধুৰী ইনষ্টিটিউট ফাৰ্মাচিকেল ছাইন্স(GIPS), গুৱাহাটীৰ শিক্ষাৰ্থীসকলৰ ছমাহৰ বাবে ২০ শতাংশ মাহিলি টিউশ্যন মাচুল হ্ৰাস কৰা হৈছে।” তেওঁ কয়।
চৌধুৰীয়ে আৰু কয় যে দিছপুৰস্থিত শ্ৰীমন্ত শংকৰ একাডেমি চিনিয়ৰ হায়াৰ ছেকেণ্ডাৰী স্কুলৰ মাহিলি টিউশ্যন মাচুল চলিত বৰ্ষৰ জুলাই পৰা ছেপ্তেম্বৰ মাহলৈকে ২০ শতাংশ হ্ৰাস কৰা হৈছে।
ইফালে পাণবজাৰস্থিত শ্ৰীমন্ত শংকৰ একাডেমিৰ শিক্ষাৰ্থীৰ মাহিলি টিউশ্যন মাচুল চলিত বৰ্ষৰ জুলাই পৰা ছেপ্তেম্বৰ মাহলৈকে ১৫ শতাংশ হ্ৰাস কৰা হৈছে।
সোমবাৰে প্ৰকাশ কৰা এই সম্পৰ্কীয় জাননীত কোৱা হৈছে যে ইতিমধ্যে টিউশ্যন মাচুল জমা দিয়া শিক্ষাৰ্থীসকলৰ টিউশ্যন মাচুলৰ ৰেহাই আগন্তুক সময়ত কৰ্তৃপক্ষই মিলাই ল’ব।
চৌধুৰীয়ে লগতে জনায় যে, তেজপুৰস্থিত GIMT-এ ইতিমধ্যে কোভিড চিকিৎসালয় হিচাপে সেৱা আগবঢ়োৱাই আহিছে আৰু অতি শীঘ্ৰেই গুৱাহাটীস্থিত GIMTক ১,০০০ বিচনাযুক্ত কোভিড চিকিৎসালয়ৰূপে গঢ়ি তোলা হ’ব।
