মুখ্য নিৰ্বাচন আয়ুক্ত জ্ঞানেশ কুমাৰৰ পদত্যাগৰ দাবীত অনুষ্ঠিত এক প্ৰতিবাদী কাৰ্যসূচীত অংশগ্ৰহণ কৰাৰ বাবে বলীউডৰ অভিনেতা আমিৰ খানৰ ভাগিন তথা অভিনেতা ইমৰান খানক অহা ২৮ অক্টোবৰৰ ভিতৰত ভাৰত ত্যাগ কৰিবলৈ নিৰ্দেশ দি মুম্বাই আৰক্ষীয়ে এখন জাননী জাৰি কৰিছে। ভাৰতীয় নাগৰিক নোহোৱা সত্ত্বেও ভাৰতত ৰাজনৈতিক প্ৰতিবাদত অংশগ্ৰহণ কৰাৰ অভিযোগত প্ৰব্ৰজন আৰু বিদেশী আইনৰ সংশ্লিষ্ট ধাৰাৰ অধীনত অভিনেতাগৰাকীৰ বিৰুদ্ধে এই ব্যৱস্থা গ্ৰহণ কৰা হৈছে। মুম্বাই আৰক্ষীয়ে জাৰি কৰা এই জাননীযোগে অভিনেতাগৰাকীক নিৰ্ধাৰিত সময়সীমাৰ ভিতৰত দেশ এৰিবলৈ নিৰ্দেশ দিয়া হৈছে।
এক বিবৃতিত আৰক্ষীয়ে কয় যে, “অভিনেতা ইমৰান খানক ২৮ অক্টোবৰৰ ভিতৰত ভাৰত ত্যাগ কৰিবলৈ নিৰ্দেশ দি মুম্বাই আৰক্ষীয়ে এখন জাননী জাৰি কৰিছে। মুখ্য নিৰ্বাচন আয়ুক্ত জ্ঞানেশ কুমাৰৰ পদত্যাগৰ দাবীত মুম্বাইৰ আগষ্ট ক্ৰান্তি ময়দানত অনুষ্ঠিত এক প্ৰতিবাদত ইমৰান খানে অংশগ্ৰহণ কৰিছিল। মুম্বাই আৰক্ষীয়ে তেওঁক আটক কৰাৰো ব্যৱস্থা কৰিছিল। ভাৰতীয় নাগৰিক নোহোৱা সত্ত্বেও প্ৰতিবাদত অংশগ্ৰহণ কৰাৰ বাবে প্ৰব্ৰজন আইনৰ সংশ্লিষ্ট ধাৰাৰ অধীনত ইমৰান খানৰ বিৰুদ্ধে ব্যৱস্থা গ্ৰহণ কৰা হৈছে।”
উল্লেখ্য যে যোৱা ১০ অক্টোবৰত মুম্বাইৰ আগষ্ট ক্ৰান্তি ময়দানত অনুষ্ঠিত এক প্ৰতিবাদী কাৰ্যসূচীত অংশগ্ৰহণকাৰীসকলৰ ভিতৰত ইমৰান খানো আছিল। নিৰ্বাচন আয়োগৰ ভোটাৰ তালিকাৰ বিশেষ নিবিড় সংশোধন চমুকৈ এছ আই আৰ প্ৰক্ৰিয়াৰ বিৰুদ্ধে ক্ৰমাৎ বৃদ্ধি পোৱা বিৰোধিতাৰ মাজতে এই প্ৰতিবাদৰ আয়োজন কৰা হৈছিল আৰু ইয়াত মুখ্য নিৰ্বাচন আয়ুক্ত জ্ঞানেশ কুমাৰৰ পদত্যাগৰ দাবী উত্থাপন কৰা হৈছিল। দেশৰ বিভিন্ন প্ৰান্তত মুখ্য নিৰ্বাচন আয়ুক্ত আৰু ভোটাৰ তালিকা সংশোধন প্ৰক্ৰিয়াৰ বিৰুদ্ধে প্ৰতিবাদ তীব্ৰতৰ হৈ উঠাৰ সময়তে মুম্বাই আৰক্ষীয়ে উক্ত প্ৰতিবাদস্থলীৰ পৰা ইমৰান খানৰ লগতে আন কেইবাজনো প্ৰতিবাদকাৰীক আটক কৰিছিল।
বিদেশী নাগৰিক হোৱা সত্ত্বেও ৰাজনৈতিক প্ৰতিবাদত অংশগ্ৰহণ কৰাৰ অভিযোগক কেন্দ্ৰ কৰিয়েই খানৰ বিৰুদ্ধে এই পদক্ষেপ গ্ৰহণ কৰা হৈছে। ভাৰতৰ বৈদেশিক নাগৰিক চমুকৈ অ’ চি আই কাৰ্ডধাৰীসকলক ভাৰতত বসবাস কৰাৰ অনুমতি দিয়া হয় আৰু তেওঁলোকে কেইবাটাও বিশেষ সুবিধা লাভ কৰে যদিও ভাৰতীয় নাগৰিকৰ সমান ৰাজনৈতিক অধিকাৰ নাথাকে আৰু প্ৰযোজ্য আইনৰ অধীনত কিছুমান নিষেধাজ্ঞাৰ মাজত থাকিবলগীয়া হয়। ইয়াৰ পূৰ্বে ভাৰতীয় জনতা পাৰ্টিৰ প্ৰাক্তন সাংসদ কিৰিট ছোমাইয়াই অভিনেতাগৰাকী অ’ চি আই মৰ্যাদাপ্ৰাপ্ত এজন আমেৰিকান নাগৰিক বুলি অভিযোগ উত্থাপন কৰি এই প্ৰতিবাদত তেওঁৰ অংশগ্ৰহণক লৈ প্ৰশ্ন উত্থাপন কৰিছিল। ছোমাইয়াই অভিনেতাগৰাকীৰ বিৰুদ্ধে প্ৰব্ৰজন সম্পৰ্কীয় ব্যৱস্থা গ্ৰহণৰ দাবী জনাই সংশ্লিষ্ট কৰ্তৃপক্ষৰো কাষ চাপিছিল।
১০ অক্টোবৰৰ এই প্ৰতিবাদ আছিল ভোটাৰ তালিকাৰ বিশেষ নিবিড় সংশোধন প্ৰক্ৰিয়াক লৈ মুখ্য নিৰ্বাচন আয়ুক্ত জ্ঞানেশ কুমাৰৰ বিৰুদ্ধে চলা ব্যাপক প্ৰতিবাদৰ অংশ, য’ত প্ৰতিবাদকাৰীসকলে ভোটাৰ তালিকা সংশোধনক লৈ উদ্বেগ প্ৰকাশ কৰাৰ লগতে নিৰ্বাচন আয়োগৰ পৰা দায়বদ্ধতা দাবী কৰিছে। বৰ্তমান মুম্বাই আৰক্ষীৰ শেহতীয়া জাননী অনুসৰি ইমৰান খানক ২৮ অক্টোবৰৰ ভিতৰত ভাৰত এৰিবলৈ নিৰ্দেশ দিয়া হৈছে আৰু এই সমগ্ৰ ঘটনাক্ৰমে বিদেশী নাগৰিকসকলৰ বাবে প্ৰযোজ্য নিয়ম তথা ৰাজনৈতিক কাৰ্যকলাপত তেওঁলোকৰ অংশগ্ৰহণৰ বিষয়টোক বিশেষভাৱে চৰ্চালৈ আনিছে।
