ৰাজ্যত পুনৰ এগৰাকী মেধাৱী ছাত্ৰক নিশা আৰক্ষীয়ে ঘৰৰ পৰা উঠাই নিয়াৰ ঘটনা সংঘটিত হৈছে শিৱসাগৰত।
শিৱসাগৰ জিলাৰ থাওৰাৰ ৰজাবাৰী নিবাসী তথা গুৱাহাটী বিশ্ববিদ্যালয়ৰ ছাত্ৰ দীপজ্যোতি গগৈক সোমবাৰে নিশা প্ৰায় ৮.৩০ মান বজাত নিজ গৃহৰ পৰা আৰক্ষীয়ে আটক কৰি নিয়ে।
বগা ৰঙৰ এখন গাড়ীত অহা আৰক্ষীৰ দলটোৱে নিজকে শিৱসাগৰ আৰক্ষীৰ দল বুলি পৰিচয় দিছিল বুলি পৰিয়ালৰ সূত্ৰৰ পৰা জানিব পৰা গৈছে।
পিছত যুৱকজনক ডিমৌ আৰক্ষী থানালৈ নিয়া হয় যদিও ৰাতি ডিমৌ আৰক্ষীয়ে যুৱকজনক গুৱাহাটীৰ ক্ৰাইম ব্ৰাঞ্চক চমজায় দিয়ে আৰু ক্ৰাইম ব্ৰাঞ্চৰ দলটোৱে যুৱকজনক মাজ নিশা গুৱাহাটীলৈ লৈ আনে।
উল্লেখ্য যে গুৱাহাটী বিশ্ব বিদ্যালয়ত অধ্যয়ণৰত মেধাৱী ছাত্ৰ দীপজ্যোতিয়ে ১৬ জুলাইত সামাজিক মাধ্যমত ‘ৰাষ্ট্ৰলৈ এখন মুকলি চিঠি’ নামৰ তেওঁ আবৃতি কৰা এটা কবিতা আপলোড দিছিল।
ইয়াৰ উপৰি তেওঁ অখিল গগৈৰ মুক্তিৰ দাবী কৰি বিভিন্ন পোষ্ট দিছিল সামাজিক মাধ্যমত। কা বিৰোধী আন্দোলনত জড়িত আছিল দীপজ্যোতি গগৈ।
দীপজ্যোতিক এইদৰে ৰাতি আৰক্ষীৰ লোকে আটক কৰা ঘটনাক তীব্ৰ বিৰোধিতা কৰিছে তেওঁৰ বন্ধু-বান্ধৱে। সামাজিক মাধ্যমত সকলোৱে দীপজ্যোতিক মুকলি কৰি দিবলৈ দাবী জনাইছে।
আনহাতে বৃহত্তৰ অসমীয়া যুৱ মঞ্চই ছাত্ৰৰ ওপৰত কৰা এনে অত্যাচাৰক ধিক্কাৰ জনোৱাৰ লগতে মেধাৱী ছাত্ৰজনক মুকলি কৰি দিবলৈ দাবী জনায়।
জানিব পৰা মতে দীপজ্যোতি ফেইচবুকত সপোনৰ শিৱসাগৰ নামৰ এটা পেইজৰ লগতো জড়িত।
