মঙলবাৰে বিয়লি মুখ্য মন্ত্ৰী সৰ্বানন্দ সোণোৱালে বঙাইগাঁও জিলাৰ ৩৪ নং অভয়াপুৰী উত্তৰ বিধানসভা সমষ্টিৰ অন্তৰ্গত জামদহা, জাৰাগুৰীত আই নদীৰ বানপানীত ক্ষতিগ্ৰস্ত অঞ্চল পৰিদৰ্শন কৰাৰ লগতে আশ্ৰয় শিৱিৰত থকা বন্যাৰ্তৰ লগত মত বিনিময় কৰি পৰিস্থিতিৰ বুজ লয়।
যোৱা ২৫ জুনৰ পৰা ধাৰাবাহিকভাৱে হৈ থকা আই, মানাহ নদীৰ বানপানীয়ে অভয়াপুৰী উত্তৰ বিধান সভা সমষ্টিৰ অন্তৰ্গত ৫০ খনতকৈ অধিক গাঁও বানপানীৰ কৱলত পৰি যমৰ যাতনাত ভুগিব লগা হৈছে।
আই নদীৰ পৰা ওলোৱা নতুন সুঁতিয়ে জামদহা, জাৰাগুৰী অঞ্চলৰ প্ৰায় দুই শতাধিক পৰিয়ালৰ ঘৰ-বাৰী ভাঙি যোৱাত ৰাস্তাত শিৱিৰ পাতি আশ্ৰয় লৈ থকা বন্যাৰ্তৰ লগত মত বিনিময় কৰি পৰিস্থিতিৰ বুজ লয় মুখ্য মন্ত্ৰী সৰ্বানন্দ সোণোৱালে।
পিছত গৰাখহনীয়াত ক্ষতিগ্ৰস্ত পৰিয়াল সমূহক পুনৰ সংস্থাপনৰ ব্যৱস্থা কৰাৰ লগতে বানপানী শেষ হোৱাৰ পিছতেই আই নদীৰ নতুন সুঁতিৰ মুখত মথাউৰি নিৰ্মাণ কৰাৰ নিৰ্দেশ দিয়ে।
লগতে কয় নৰেন্দ্ৰ মোডীৰ নিৰ্দেশ মৰ্মে উত্তৰ-পূবৰ বান পৰিস্থিতি নিয়ন্ত্ৰণৰ বাবে এখন কমিটি গঠন কৰা হৈছে গতিকে বানপানীৰ ফলত হোৱা ক্ষতিগ্ৰস্ত সকলোক সহায় কৰা হব বুলি সোণোৱালে উল্লেখ কৰে।
পৰিদৰ্শনৰ সময়ত মুখ্য মন্ত্ৰী সৰ্বানন্দ সোমোৱালৰ লগতে যোগান মন্ত্ৰী ফণীভূষণ চৌধুৰী, জলসম্পদ মন্ত্ৰী কেশব মহন্ত, পৰ্যটক মন্ত্ৰী চন্দন ব্ৰহ্ম, স্থানীয় বিধায়ক আব্দুল হাই নাগৰি, বিজনী সমষ্টিৰ বিধায়ক কমল সিং নাৰ্জাৰী, বঙাইগাওঁ জিলা উপায়ুক্ত ডঃ এম এছ লক্ষ্মী প্ৰিয়া, জিলা আৰক্ষী অধীক্ষক, বিভিন্ন বিভাগৰ বিষয়া-কৰ্মচাৰীৰ লগতে সহস্ৰাধিক বন্যাৰ্ত ৰাইজ উপস্থিত থাকে।
