গুৱাহাটীৰ চাৰি গৰাকী শিক্ষাৰ্থীৰ প্ৰচেষ্টাত আজি চন্দ্ৰপুৰ আৰু ডিমৰীয়াৰ প্ৰায় ৩৫০ টা বানাক্ৰান্ত পৰিয়ালক বান সাহায্য প্ৰদান কৰা হয়।
গুৱাহাটীৰ শিক্ষাৰ্থী ক্ৰমে ৰক্তিম শৰ্মা, ৰিশা গোস্বামী, অভিষেক গোস্বামী আৰু প্ৰতীক ফুকনৰ উদ্যোগত ডাঃ পুতুল শৰ্মাৰ তত্বাৱধানত এই বান সাহায্য প্ৰদান কৰা হয়।
ডিমৰীয়াৰ টিলাবস্তী, বৰিবিলা, বিলপাৰ, ডিগাৰুপাৰ আৰু নিউ ডিগাৰুপাৰৰ লগতে চন্দ্ৰপুৰৰ ধিপুজী আৰু চন্দ্ৰপুৰ নিম্ন বুনিয়াদী বিদ্যালয়ৰ সাহায্য শিবিৰৰ বন্যাৰ্তৰ পৰিয়ালসমূহৰ মাজত বান সাহায্য বিতৰণ কৰা হয় ৷
বন্যাৰ্ত সকলক চাউল, দাইল, মুড়ি, চিৰা, চাবোন, বিস্কুট, চেনি আদিৰ ওপৰিও অ’ আৰ এছ, মাস্ক, কাপোৰ, চেনেটেৰি নেপকিন, পানী শুদ্ধিকৰণ দ্ৰৱ্য, ব্লিচিং পাউদাৰ, ঔষধ আদি বিতৰণ কৰা হয়।
মহানগৰীৰ চাৰি শিক্ষাৰ্থীয়ে চন্দ্ৰপুৰ আঞ্চলিক ছাত্ৰ সন্থা, চন্দ্ৰপুৰ অধ্যয়ন চক্ৰ আৰু প্ৰগতিশীল যুৱ মঞ্চ, বৰবিলাৰ সদস্যসকলৰ সহযোগিতাত প্ৰায় দুই কিঃ মিঃ নদী পথা নাৱেৰে যাতায়ত কৰি বানবিধ্বস্ত দুৰ্গম এলেকাসমূহত সাহায্য প্ৰদান কৰে।
ডিজিটেল মাধ্যমৰ যোগেদি দেশ-বিদেশৰ বিভিন্নজনৰ পৰা লাভ কৰা বৰঙণিৰে এই সাহায্য প্ৰদান কৰা হয়।
উল্লেখ্য যে বাট-পথ নাইকীয়া অতি দুৰ্গম ঠাইসমূহক সামৰি শিক্ষাৰ্থী সকলে লোৱা এই প্ৰচেষ্টাৰ শলাগ লয় অঞ্চলবাসীয়ে।
সাহায্য প্ৰদান কাৰ্য্যসূচীত ডাঃ পুতুল শৰ্মা, আছুৰ কেন্দ্ৰীয় কাৰ্যনিৰ্বাহক টুটুমনি কলিতা, উদ্যোক্তা শিক্ষাৰ্থী ক্ৰমে ৰক্তিম শৰ্মা, ৰিশা গোস্বামী, অভিষেক গোস্বামী, প্ৰতীক ফুকন, কটন কলেজৰ প্ৰাক্তন সাধাৰণ সম্পাদক জিন্টু ঠাকুৰীয়া, কামৰূপ মহানগৰ জিলা ছাত্ৰ সন্থাৰ ক্ৰীড়া সম্পাদক দিপজ্যোতি মালাকাৰকে আদি কৰি চন্দ্ৰপুৰ আঞ্চলিক ছাত্ৰ সন্থা, চন্দ্ৰপুৰ অধ্যয়ন চক্ৰ, বৰবিলা প্ৰগতিশীল যুৱ মঞ্চৰ সদস্য সকল উপস্থিত থাকে।
