আজিৰে পৰা আৰম্ভ হোৱা সন্মানীয় কম্ব’ডিয়া আন্ত:ৰাষ্ট্ৰীয় চলচ্চিত্ৰ মহোৎসৱত ভূটানৰ ১০ খন চলচ্চিত্ৰ প্ৰদৰ্শিত হ’ব।
উল্লেখ্য যে কম্ব’ডিয়াৰ ফেনম পেনহত অহা ১৫ মাৰ্চলৈ চলিবলগীয়া এই আন্ত:ৰাষ্ট্ৰীয় চলচ্চিত্ৰ মহোৎসৱখনত আঠগৰাকীকৈ ভূটানী পৰিচালকে পৰিচালনা কৰা ১০ খন ভিন্ন ৰুচিৰ চলচ্চিত্ৰ প্ৰদৰ্শন কৰা হ’ব।
ভূটান ফিল্ম ট্ৰাষ্টে এক প্ৰেছ বিবৃতিযোগে প্ৰকাশ কৰা অনুসৰি চলচ্চিত্ৰ মহোৎসৱত প্ৰদৰ্শিত হ’ব লগা চুটি ছবি, তথ্যচিত্ৰৰ মাধ্যমেৰে ভূটানৰ সমস্যাসমূহ উপস্থাপন কৰিব পৰিচালকসকলে।
উল্লেখ্য যে এই আন্ত:ৰাষ্ট্ৰীয় চলচ্চিত্ৰ মহোৎসৱখনত ভূটানৰ ‘এ ফৰগটেন ষ্ট’ৰী’, ‘গাৰ্ল উইথ এ ৰেড স্কাই’, ‘দ্য ৰেড দ’ৰ’ৰ লগতে আৰু কেইবাখনো চুটি ছবি আৰু তথ্যচিত্ৰ প্ৰদৰ্শিত হ’ব।
চলিত এই কম্ব’ডিয়া আন্ত:ৰাষ্ট্ৰীয় চলচ্চিত্ৰ মহোৎসৱত ভূটানৰ প্ৰতিনিধি হিচাপে উপস্থিত থাকি অনুষ্ঠানটোৰ সৌষ্ঠৱ বৃদ্ধি কৰিব প্ৰথিতযশা অভিনেতা-পৰিচালক লুডেই চৌফেলেই।
উল্লেখ্য যে ‘পেন’ৰমা অন ভূটান চিনেমা’ শীৰ্ষক শিতানত এই চলচ্চিত্ৰ মহোৎসৱত ভূটানৰ চলচ্চিত্ৰ সমূহ প্ৰদৰ্শিত হ’ব বুলি বিবৃতিটো যোগে প্ৰকাশ কৰিছে ভূটান ফিল্ম ট্ৰাষ্টে।
ইয়াৰ জৰিয়তে ভূটানৰ চলচ্চিত্ৰই আন্ত:ৰাষ্ট্ৰীয় সমাদৰ তথা স্বীকৃতি লাভৰ উপৰি দেশখনৰ সমস্যা সমূহো সমগ্ৰ বিশ্ববাসীয়ে জনাৰ সুযোগ পাব। তদুপৰি ইয়াৰ মাধ্যমৰে দেশখনৰ প্ৰতিভাসমূহে এখন নতুন মঞ্চ লাভ কৰিব বুলি আশা প্ৰকাশ কৰিছে ভূটান ফিল্ম ট্ৰাষ্টে।
