বৰপেটা চহৰৰ ঘোঁৰামাৰা হাটীৰ এটি দৰিদ্ৰ পৰিয়ালৰ একমাত্ৰ উপাৰ্জনকাৰী ব্যক্তি জিতু দাসে জটিল ৰোগত আক্ৰান্ত হৈ বিগত এমাহ ধৰি শয্যাগত হৈ থকাৰ পিছত আজি জিতু দাসৰ বাসগৃহত উপস্থিত হয় এ আই য়ু ডি এফ দলৰ এটি দল৷
উল্লেখ্য যে, ঘোঁৰামাৰা হাটীৰ জিতু দাস নামৰ শ্ৰমিকজনে জটিল ৰোগত আক্ৰান্ত হৈ থকা খবৰটো স্থানীয় সাংবাদিক পুলেন্দ্ৰ দাসে এ আই য়ু ডি এফ দলৰ জিলা সভাপতি মুফতি ছামচুদ্দিন আহমেদ কাচিমী আৰু সাধাৰণ সম্পাদক আশ্ৰাফুল মামুনক অৱগত কৰোৱায়৷
লগতে পৰিয়ালটোৰ একমাত্ৰ উপাৰ্জনকাৰী ব্যক্তিজনৰ চিকিৎসাৰ বাবে আজমল ফাউণ্ডেচনৰ পৰা সহায় কৰাৰ বাবে এ আই য়ু ডি এফ দলৰ জিলা সভাপতি আৰু সাধাৰণ সম্পাদকক আহ্বান জনাই সাংবাদিক গৰাকীয়ে৷
সাংবাদিক গৰাকীৰ আহ্বানৰ প্ৰতি লক্ষ্য ৰাখি আজি পুৱাৰ ভাগত এ আই য়ু ডি এফ দলৰ জিলা সভাপতি মুফতি ছামচুদ্দিন আহমেদ কাচিমী আৰু সাধাৰণ সম্পাদক আশ্ৰাফুল মামুনৰ নেতৃত্বত যোৱা প্ৰতিনিধিৰ দলটিয়ে জিতু দাসৰ স্বাস্থ্যৰ অৱস্থাৰ বুজ লোৱাৰ লগতে পৰিয়ালটোৰ সদস্যৰ সৈতে কিছু আলোচনা কৰে৷
জিতু দাসৰ চিকিৎসা প্ৰদানৰ বাবে নেতা দুগৰাকীয়ে ব্যক্তিগতভাৱে আজি দহ হাজাৰ টকা প্ৰদান কৰে৷
জিতু দাসৰ চিকিৎসাৰ বাবে আজমল ফাউণ্ডেশ্যনৰ পৰা আৰ্থিক অনুদান অনাৰ ক্ষেত্ৰত দলৰ মুৰব্বী বদৰুদ্দিন আজমলৰ লগত আজিয়েই টেলিফোনিক বাৰ্তালাভ কৰিব বুলি জানিবলৈ দিয়ে প্ৰতিনিধিৰ দলটিয়ে৷
শয্যাগত হৈ থকা জিতু দাসৰ চিকিৎসাৰ বাবে সদাশয় লোকসকলকো সহায়ৰ হাত আগবঢ়াবলৈ অনুৰোধ জনায় আশ্ৰাফুল মামুনে৷ প্ৰতিনিধিৰ দলটোৰ সৈতে সাংবাদিক ছফিক আহমেদো উপস্থিত থাকে।
