বিলাসী বাহন নিৰ্মাণকাৰী প্ৰতিষ্ঠান BMW-এ এইবাৰ বাইকৰ বজাৰতো ভূমুকি মাৰিলে।
জাৰ্মানীৰ কোম্পানীটোৱে ভাৰতত মুকলি কৰিলে R18 মডেলৰ BMW বাইক।
BMW মটৰেড নামৰ ভগ্নী প্ৰতিষ্ঠানটোৰ বেনাৰত কোম্পানীটোৱে দেশৰ আগশাৰীৰ চহৰ সমূহত বিক্ৰীৰ বাবে উলিয়াই দিয়া এই বাইকে দেশত প্ৰচলিত বিলাসী বাইক সমূহৰ সৈতে ব্যৱসায়িক প্ৰতিদ্বন্দ্বিতাত অৱতীৰ্ণ হ’ব বুলি ধাৰণা কৰা হৈছে।
BMW R18 মডেলৰ একোখন বাইকৰ মূল্য দুটা মডেলৰ বাবে বেলেগ বেলেগ হ’ব।
এটা মডেলৰ BMW R18 বাইকৰ মূল্য হৈছে ১৮.৯ লাখ টকা।
বজাৰত মুকলি কৰি দিয়া আন এটা মডেলৰ BMW R18 বাইকৰ মূল্য হৈছে ২১.৯ লাখ টকা।
BMW মটৰেডৰ প্ৰেচিডেণ্ট বিক্ৰম পাৱাই প্ৰকাশ কৰা মতে এই দুয়োটা মডেলৰ বাইক যুৱ প্ৰজন্মৰ ৰুচিৰ প্ৰতি গুৰুত্ব দি নিৰ্মাণ কৰা হৈছে।
১,৮০২ চি চিৰ ইঞ্জিনযুক্ত এই দুয়োটা মডেলৰ বাইকেই ভাৰতত বাইকাৰসকলৰ মাজত জনপ্ৰিয়তা অজৰ্ন কৰিবলৈ সক্ষম হ’ব বুলি তেওঁ আশা কৰে।
তেওঁ লগতে কয় যে যুগৰ সৈতে খাপ খুৱাই BMW R18 বাইকৰ মডেল দুটা ভাৰতত মুকলি কৰা হৈছে।
বিশ্বৰ আন বহু দেশত BMW R18 বাইকে ব্যাপক জনপ্ৰিয়তা অৰ্জন কৰা বুলি তেওঁ মন্তব্য কৰে।
