কেন্দ্ৰৰ বিজেপি নেতৃত্বাধীন চৰকাৰখনে কৃষকৰ স্বাৰ্থৰ পৰিপন্থী আইন জাপি দিয়াৰ ষড়যন্ত্ৰৰ বিৰুদ্ধে প্ৰতিবাদ জনাই দেশৰ কেইবাটাও কৃষক সংগঠনে সন্মিলিতভাৱে শুকুৰবাৰে ভাৰত বন্ধৰ আহ্বান দিছে।
প্ৰকৃততে, কৃষি বিধেয়কৰ প্ৰতিবাদত এই ভাৰত বন্ধৰ আহ্বান দিয়া হৈছে। দেশৰ একাধিক কৃষক সংগঠনে এই বন্ধৰ আহ্বান দিছে আৰু আজি বিশেষকৈ পঞ্জাৱত এই বন্ধৰ সৰ্বাত্মক প্ৰভাৱ পৰিব বুলি আশা কৰা হৈছে।
কৃষক সংগঠনসমূহৰ এই ভাৰত বন্ধৰ প্ৰতি দেশৰ প্ৰধান বিৰোধী দল কংগ্ৰেছেও সমৰ্থন আগবঢ়াইছে।
অল ইণ্ডিয়া ফাৰ্মাৰ্ছ য়ুনিয়ন, অল ইণ্ডিয়া কিষাণ সংঘৰ্ষ কো-অৰ্ডিনেশ্যন কমিটি, অল ইণ্ডিয়া কিষাণ মহাসংঘই সন্মিলিতভাৱে এই বন্ধৰ আহ্বান জনাইছে।
ইপিনে, কৰ্ণাটক, মহাৰাষ্ট্ৰ, তামিলনাডুৰ কৃষকসকলে বন্ধৰ সমৰ্থনত আগবাঢ়ি অহাৰ সময়ত ওলা চালকৰ পৰা ট্ৰাক ড্ৰাইভাৰসকলৰ সংগঠনেও তেওঁলোকৰ প্ৰতি সমৰ্থন আগবঢ়াইছে।
কৃষি বিধেয়কৰ বিৰুদ্ধে দুমাহ ধৰি বিশাল প্ৰতিবাদৰে ৰাজপথলৈ ওলাই আহিবলৈ সাজু হৈছে কংগ্ৰেছ। তেওঁলোকে আজিৰে পৰাই সেই অভিযান আৰম্ভ কৰিছে।
দেশৰ ২কোটি কৃষকৰ স্বাক্ষৰ সম্বলিত প্ৰতিবাদ পত্ৰ ইতিমধ্যে কংগ্ৰেছৰ হাইকমাণ্ডৰ হাতত অৰ্পণ কৰা হৈছে। ইয়াৰ পাছতে তেওঁলোকে প্ৰতিবাদত নামিবলৈ সাজু হৈছে।
আজিৰ ভাৰত বন্ধলৈ অসমৰো কেইবাটাও সংগঠনে সমৰ্থন আগবঢ়াইছে। অসমত এই বন্ধ সফল কৰি তুলিবলৈ আঞ্চলিক গণ মৰ্চাই আহ্বান জনাইছে।
