কভিড১৯ সংক্ৰমনত যোৰহাট চিকিৎসা মহাবিদ্যালয়ত চিকিৎসাধীন হৈ থকা বোকাখাতৰ সুচিকিৎসক ডা৹ কানুকৃষ্ণ বৰদলৈৰ আজি পুৱা মৃত্যু হয়৷
বোকাখাত অঞ্চলত অতি জনপ্ৰিয় একালৰ সুদক্ষ ফুটবল খেলুৱৈ ডা৹ কানুকৃষ্ণ বৰদলৈৰ মৃত্যুত সমগ্ৰ বোকাখাততে শোকৰ ছাঁ পৰিছে৷
বোকাখাতৰ সমীপৰ ডিফলু চাহ বাগিছাত চিকিৎসক হিচাবে কাম কৰা ডা৹ কানুকৃষ্ণ বৰদলৈয়ে ১৯৯৯ চনত বাগিছাখনৰ পৰা স্বেচ্ছাসেৱক অৱসৰ গ্ৰহন কৰি বোকাখাতৰ নিৰ্মল ফাৰ্মেচিত চিকিৎসা সেৱাৰ পাতনি মেলে৷
দৰিদ্ৰ জনসাধাৰণ আৰু চাহ বাগিছাৰ লোকৰ মাজত অতিশয় জনপ্ৰিয় চিকিৎসক গৰাকী সকলোৰে বাবে ত্ৰানকৰ্তা আছিল৷
বোকাখাতৰ বিজ্ঞান শিক্ষাৰ অন্যতম অনুষ্ঠান চন্দ্ৰ নাথ বেজবৰুৱা বিজ্ঞান মহাবিদ্যালয়ৰ পৰিচালনা সমিতিৰ প্ৰাক্তন সভাপতি ডা৹ বৰদলৈ এজন জনপ্ৰিয় ক্ৰীড়া সংগঠকো আছিল৷
অবিবাহিত ডা৹ কানুকৃষ্ণ বৰদলৈ বোকাখাতৰ জ্যোতিপুৰৰ নিৱাসী আছিল৷
ইফালে কভিড১৯ৰ সংক্ৰমনত বোকাখাত প্ৰতিষ্ঠিত ব্যৱসায়ী তথা ভাৰতীয় জনতা পাৰ্টিৰ ৰাজ্যিক কাৰ্যনিৰ্বাহক সদস্য শম্ভু দেৱৰো যোৰহাট চিকিৎসা মহাবিদ্যালয়ত মৃত্যু হয়৷
শম্ভু দেৱ বোকাখাতৰ দেৱ শ্বু আৰু এইচ পি গেছ এজেঞ্চিৰ স্বত্বাধিকাৰ আছিল৷
একে সময়তে বোকাখাতৰ উদয়ামান যুৱক শৈলেন শইকীয়াৰো আজি পুৱা মগজুৰ আকস্মিক ৰক্তক্ষৰণৰ বাবে গুৱাহাটীত চিকিৎসাধীন অৱস্থাতে মৃত্যু হয়৷
আজিৰ দিনটোত তিনিজনকৈ লোকৰ মৃত্যুত শোকত ম্ৰিয়মান হৈ পৰে সমগ্ৰ বোকাখাত৷
