তিনিচুকীয়া জিলাৰ মাৰ্ঘেৰিটা সমষ্টিতৰ অন্তৰ্গত বুঢ়ীদিহিং মৌজাৰ লোকসকলে যাতায়াতৰ ক্ষেত্ৰত ব্যাপক সমস্যাৰ সন্মুখীন হৈ আহিছে।
মাৰ্ঘেৰিটা বিধানসভা সমষ্টিৰ অন্তৰ্গত বুঢ়িদিহিং মৌজাৰ পেঙেৰী পৰা পপোলাজান দুৱাৰমাৰা সংযোগী দলং পপোলাজান নৈৰ ওপৰত এখন পকী দলংৰ নিৰ্মাণ কাৰ্য চলি আহিছে।
কিন্তু অতি পৰিতাপৰ কথা যে, এই পকী দলংখনৰ নিৰ্মাণ কাৰ্য চলি থকাৰ সময়তেই পপোলাজান নৈৰ ওপৰত থকা এখন মাত্ৰ কাঠৰ দলংখন বাঢ়নী পানীত সম্পূৰ্ণ খহি পৰিল, বৰ্তমান সমগ্ৰ অঞ্চলটোৰ ৰাইজে বহিঃৰাজ্যৰ লগত সংযোগ কৰাৰ ক্ষেত্ৰত যথেষ্ট সমস্যাৰ সন্মুখীন হৈ আহিব লগা হৈছে।
এনে সমস্যা সমূহ সমাধানৰ দাবীত আজি সদৌ অসম ছাত্ৰ সন্থা আৰু অসম জাতীয়তাবাদী যুৱ ছাত্ৰ পৰিষদৰ পেঙেৰী-বৰডুমচা আঞ্চলিক সমিতিয়ে মানৱ শৃংখল কাৰ্যসূচী ৰূপায়ণ কৰি তীব্ৰ প্ৰতিবাদ সাব্যস্ত কৰে।
ডি বি এণ্টাৰপ্ৰাইজ নামৰ দলং নিৰ্মাণকাৰী কোম্পানিটোৱে লেহেমীয়া গতিত দলংখন নিৰ্মাণ কৰা বুলিও ৰাইজে অভিযোগ উত্থাপন কৰিছে।
বৃহত্তৰ অঞ্চলটোৰ বহিঃ বিশ্বৰ সৈতে যোগাযোগৰ একমাত্ৰ পথটোৰ ওপৰত থকা দলংখন এনেদৰে খহি পৰাত ব্যাপক সমস্যাৰ সৃষ্টি হৈছে অঞ্চলটোৰ লোকসকলৰ।
যাৰ পৰিপ্ৰেক্ষিতত খহি পৰা দলংখনৰ মোৰামতি ব্যৱস্থা নকৰাত বিপদসংকুল ভাৱে নৈৰ ওপৰে যাত্ৰা অব্যাহত ৰাখিছে বৃহত্তৰ অঞ্চলটোৰ কেইবা হাজাৰ ৰাইজে।
অন্যহাতে, স্থানীয় বিধায়ক ভাস্কৰ শৰ্মাই খহি পৰা দলংখন প্ৰদৰ্শন কৰিবলৈ আহিছিল যদিও কোনো ব্যৱস্থা গ্ৰহণ নকৰাৰ অভিযোগ তুলি আজি আছু আৰু যুৱ ছাত্ৰ পৰিষদৰ সদস্যই আন্দোলনৰ কাৰ্যসূচী ৰূপায়ণ কৰিবলৈ বাধ্য হয় বুলি উল্লেখ কৰিছে আজিৰ প্ৰতিবাদকাৰী সকলে।
অতি শীঘ্ৰেই দলংখন পুনৰ নিৰ্মাণ কৰি জনসাধাৰণৰ যাতায়াত সুচল কৰি তুলিবলৈ স্থানীয় লোকসকলৰ লগতে বিভিন্ন দল-সংগঠনে বিভাগীয় কৰ্তৃপক্ষক দাবী জনাই আহিছে যদিও বিভাগীয় কৰ্তৃপক্ষই এইক্ষেত্ৰত ক্ষিপ্ৰ ব্যৱস্থা গ্ৰহণ নকৰাত দল সংগঠনৰ লগতে স্থানীয় ৰাইজ ক্ষুব্ধ হৈ পৰা পৰিলক্ষিত হৈছে।
অতি শীঘ্ৰে দলংখনৰ নিৰ্মাণ নকৰিলে তীব্ৰ গণতান্ত্ৰিক আন্দোলন ৰূপায়ণ কৰিবলৈ বাধ্য হ’ব বুলি আজিৰ প্ৰতিবাদকাৰী সকলে প্ৰতিবাদস্থলীৰ পৰা হুংকাৰ প্ৰদান কৰে।
আজিৰ প্ৰতিবাদৰ পাছত ডি বি এণ্টাৰপ্ৰাইজ নামৰ দলং নিৰ্মাণকাৰী কোম্পানিটোৰ লগতে বিভাগীয় কৰ্তৃপক্ষই এইক্ষেত্ৰত কেনেধৰণৰ ব্যৱস্থা গ্ৰহণ কৰে সেইয়া লক্ষণীয় হ’ব।
