অসম চাহ মজদুৰ সংঘৰ যোৰহাট জিলা সমিতিৰ উদ্যোগত শ্ৰমিকৰ মজুৰি ৩৫১ টকালৈ বৃদ্ধি আৰু অনান্য দাবীৰে কেন্দ্ৰীয় চাহ মজদুৰ সংঘৰ নিৰ্দেশনাত আজি টীয়ক চাহ বাগিছাৰ মূল প্ৰৱেশ পথত প্ৰতিবাদ সাব্যস্ত কৰা হয়।
৩৭ নং ৰাষ্ট্ৰীয় ঘাইপথৰ দাঁতিত থকা টীয়ক চাহ বাগিছাৰ মূল প্ৰৱেশ পথত প্ৰায় দুই শতাধিক পুৰুষ-মহিলা শ্ৰমিকে এক মানৱ শৃংখলেৰে প্ৰতিবাদী কাৰ্যসূচী গ্ৰহণ কৰে।
বিজেপি চৰকাৰে শাসনৰ গাদী দখল কৰা চাৰে চাৰিটা বছৰ উকলি যোৱাৰ পাছত চাহ শ্ৰমিকসকলক ১৬ চনৰ নিৰ্বাচনৰ পূৰ্বে প্ৰদান কৰা প্ৰতিশ্ৰুতিসমূহ পুৰণ তথা মজুৰি বৃদ্ধি নকৰাত টীয়ক, জগদুৱাৰ, নামচিচু, পদুম, সেউজীবাম চাহ বাগিছাৰ শ্ৰমিকসকল ক্ষোভিত হৈ চৰকাৰ বিৰোধী বিভিন্ন শ্ল’গানেৰে পৰিবেশ উত্তাল কৰি তোলে।
প্ৰতিবাদকাৰী সকলে ২০২১ চনৰৰ নিৰ্বাচনৰ পূৰ্বে যদি শ্ৰমিকসকলৰ নায্য দাবীসমূহ পুৰণ নকৰে তেন্তে অনাগত দিনত অধিক জংগী আন্দোলন গঢ়ি তোলাৰ হুংকাৰ প্ৰদান কৰে।
