পুনৰ আমেৰিকাৰ এখন স্কুলত গুলীচালনাৰ ঘটনা সংঘটিত হৈছে। এই গুলীচালনাত কমেও চাৰিজন লোক নিহত হৈছে। আমেৰিকাৰ অৰেগন প্ৰদেশৰ এখন স্কুলত সংঘটিত আক্ৰমণত নিহত হোৱাসকলৰ ভিতৰত তিনিজন স্কুলীয়া ছাত্ৰ। আৰক্ষীয়ে কয় যে পিছত সন্দেহজনক আক্ৰমণকাৰীৰো মৃত্যু হৈছে। এই আক্ৰমণকাৰীজনো এজন নাবালক।
বৃহস্পতিবাৰে অৰেগনৰ বেণ্ড অঞ্চলৰ এখন প্ৰাথমিক বিদ্যালয়ত সংঘটিত হয় এই মাৰাত্মক আক্ৰমণ। বেণ্ড আৰক্ষী বিষয়া মাইক ক্ৰাণ্টজে জনোৱা মতে, ছিলভাৰ ৰেল প্ৰাথমিক বিদ্যালয়ত সংঘটিত হোৱা এই আক্ৰমণত এজন শিক্ষকৰ উপৰিও তিনিজন নাবালকৰ মৃত্যু হয়। এই আক্ৰমণত নিহত তিনিজন ছাত্ৰৰ বয়স ক্ৰমে ৫, ৮ আৰু ১১ বছৰ। তদুপৰি এজন ৭ বছৰীয়া শিশু আৰু এগৰাকী ৫৪ বছৰীয়া শিক্ষক গুৰুতৰভাৱে আঘাতপ্ৰাপ্ত হৈ চিকিৎসালয়ত চিকিৎসাধীন হৈ আছে।
আৰক্ষীৰ সূত্ৰৰ পৰা জানিব পৰা মতে, ১৬ বছৰীয়া নাবালক এজনে বিদ্যালয়ত প্ৰৱেশ কৰি আক্ৰমণ কৰে। ঘটনাস্থলীত উপস্থিত থকা এজন ব্যক্তিৰ গুলীত নিহত হয় সন্দেহযুক্ত আক্ৰমণকাৰীজন।
বেণ্ড আৰক্ষীৰ মুখপাত্ৰ শ্বিলা মিলাৰে জনোৱা মতে, বৃহস্পতিবাৰে স্থানীয় সময় অনুসৰি দুপৰীয়া প্ৰায় ১ বজাত গুলীচালনা সংঘটিত হয়। এখন বাহনত গুলীচালনাৰ খবৰ পোৱাৰ পিছতে বিষয়াসকলে তাত উপস্থিত হয়।
ইয়াৰ পিছতে খবৰ লাভ কৰে যে স্কুলৰৰ ভিতৰত এজন বন্দুকধাৰীয়ে আক্ৰমণ চলাইছে। বন্ধ দুৱাৰত গুলীচালনা কৰি তেওঁ জোৰকৈ স্কুলৰ ভিতৰলৈ সোমাই যায়। বিষয়াসকল আহি পোৱাৰ লগে লগে জানিব পাৰে যে সন্দেহজনক লোকজনক লক্ষ্য কৰি গুলী চলোৱা হৈছে। তেওঁৰ ঘটনাস্থলীতে মৃত্যু হয়।
স্থানীয় এজন বাসিন্দাই তেওঁক হাতত বন্দুক লৈ বিদ্যালয়ত প্ৰৱেশ কৰা দেখিছিল। তেওঁও তাৰ পিছে পিছে স্কুলৰ ভিতৰলৈ সোমাই যায়। আৰক্ষীয়ে জনোৱা মতে, সেই ব্যক্তিজনৰ গুলীতে নিহত হৈছে সন্দেহজনক লোকজন।
আৰক্ষীয়ে এতিয়াও প্ৰকাশ কৰা নাই নিহতসকলৰ পৰিচয়। এই গুলীচালনাৰ উদ্দেশ্য এতিয়াও জানিব পৰা হোৱা নাই। গুলীচালনা কৰা লোকজন বিদ্যালয়খনৰ সৈতে জড়িত নেকি সেই সন্দৰ্ভত আৰক্ষীয়ে সদৰী কৰা নাই।
ইয়াৰ পূৰ্বেও আমেৰিকাত একাধিক বিদ্যালয়ত গুলীচালনাৰ ঘটনা সংঘটিত হৈছে। যোৱা বছৰ কে-১২ জাতীয় স্কুলত কমেও ২৩৫টা গুলীচালনাৰ ঘটনা সংঘটিত হৈছে। এই বছৰ অৰেগনৰ এই ঘটনাকে ধৰি কমেও ১৪৯টা গুলীচালনাৰ ঘটনা সংঘটিত হৈছে। সেই আক্ৰমণবোৰত বহু লোকৰ মৃত্যু হৈছে।
